MEYDAN.TV

Redaktor seçimi

Sevinc Vaqifqızı: təzyiq, zorakılıq, saxlanmalarla “zəngin” jurnalist

Video

Sevinc Abbasova Vaqif qızı 1989-cu il iyulun 5-də Füzuli rayonunda anadan olub. 1993-cü ildə Qarabağ müharibəsi zamanı məcburi köçkün düşərək ailəsi ilə birgə Bakı şəhərinə köçüb. 2006-2010-cu illərdə Sevinc BDU-nun jurnalistika fakultəsində təhsil alıb.

Tələbəlik illərindən qəzetlərlə əməkdaşlıq etməyə başlayıb. 2009-2012-ci illərdə “Bizim Yol”, 2012-2013-cü ildə isə “Azadlıq” qəzetlərində jurnalist kimi çalışıb. 2013-cü ildən Meydan TV-də video reportyor kimi işə başlayıb.

2015-ci il sentyabrın 20-də gecə saatlarında Ukraynadan təlimdən qayıdarkən polis tərəfindən saxlanılaraq Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə (Bandotdel) aparılıb. Meydan TV-yə açılan cinayət işi çərçivəsində Bakı Şəhər Ağır Cinayətlərə dair İstintaq idarəsində dindirilib. Cinayət işində şahid qismində dindirilməsinə baxmayaraq, 2015-2019-cu illərdə ölkədən çıxışına qadağa qoyulub.

2018-ci il Prezident seçkilərində seçki saxtakarlığını üzə çıxaran, “karusel” əməliyyatını göstərən materialına görə məhkəməyə verilib. 2019-cu ildə çəkiliş zamanı saxlanılaraq 10 saata yaxın Nizami rayon 24-cü Polis Bölməsində saxlanılıb.

OCCRP ilə birgə jurnalist araşdırmaları edib.

2022-ci ildən etibarən “AzbasMedia” müstəqil media platformasında baş redaktor kimi çalışır. İlham Əliyevin və yüksək vəzifəlilərin korrupsiya cinayətlərini ortaya çıxaran araşdırmalar dərc edib.

Sərhədsiz Reportyorlar Təşkilatının 2023-cü il üzrə Media Azadlığı indeksində Azərbaycan dünya üzrə 180 ölkə arasında 151-ci yerdə göstərilib. 151-ci pillədən baxanda Sevincin həbsi ilə bağlı daha aydın təsəvvür yaranmağa başlayır. Amma Sevincin özünün də dediyi kimi:

“Düşünməsinlər ki, tək-tək şəxsləri həbs etməklə bu araşdırmaları dayandıra bilərlər…”

Hakimiyyət, qarşısında gözüqırpıq jurnalistika ilə məşğul olmaq istəmədiyini deyən, təkidlərə baxmayaraq həbs ehtimalını gözə alıb, Bakıya qayıdan Sevinc Vaqifqızına cavabını onu Heydər Əliyev adına Hava limanında təyyarədən enərkən saxlamaqla verdi. Sevincə də “AbzasMedia”nın direktoru Ülvi Həsənli və Məhəmməd Kekalovla eyni maddə ilə ittiham irəli sürüldü – qaçaqmalçılıq. İndi hakimiyyət mediası korrupsiya araşdırmaları ilə məşhurlaşan sayt əməkdaşlarını elə korrupsiyada ittiham edən silsilə yazılar yazır.
Qaradağ rayonu, Ələt qəsəbəsinin Şıxlar bağ massivində yaşayan insanlar kanalizasiya və yol problemindən əziyyət çəkirlər. Buna görə də bir qrup vətəndaş etiraz edib.

Sakinlər bildirirlər ki, yolların bərbad vəziyyətdə olması yağışlı havalarda gediş-gəlişin məhdudlaşmasına səbəb olur. Həmçinin onlar deyirlər ki, yaşadıqları ərazidə zibil qablarının olmaması mövcud ərazilərdə antisanitar vəziyyətin yaranmasına gətirib çıxarır.

Sakinlər bildirirlər ki, mövcud problemlərlə bağlı aidiyyəti qurumlara dəfələrlə müraciət etsələr də, problemin həllinə dair heç bir tədbir görülməyib.

Məsələ ilə bağlı Qaradağ Rayon İcra Hakimiyyətindən cavab almaq mümkün olmadı.

“Azərsu” ASC-nin mətbuat xidmətinin rəisi Anar Cəbrayıllı isə bildirib ki, bu ərazilərdə kanalizasiya infrastrukturu mövcud deyil və 2023-cü il ərzində də quraşdırılması planlaşdırılmır.
Göygölün Dozular kəndinin sakinləri 30 ildir qaz, yol üzünə həsrət qalıblar. Sakinlər bildirirlər ki, bu gedişlə kənddə bir nəfər də qalmayacaq.

Hər kəs köçüb getməyə çalışır. Onları bu vəziyyətə şəraitsizlik məcbur edir. Kənd sakini Hüsaməddin Səbzəliyev söyləyir ki, kimə şikayət etsələr də, məsələyə baxan yoxdur.

Kənd sakinləri bildirirlər ki, sanki dövlət kəndi dağıtmağa çalışır. Kənddə yaşayanlar həmçinin yol problemindən əziyyət çəkdiklərini söyləyiblər. Kənd sakinləri hələ də ümidlidirlər ki, gec-tez kəndə qaz, yol çəkiləcək. Amma bunun daha tez olmasını istəyirlər. Çünki hər il kənd sakinlərinin sayı azalmaqdadır. Xüsusən də gənclər kəndi tərk edirlər.

Azəriqaz İB-dən bildirilib ki, həmin ərazinin 95 faizi qazlaşdırılıb. Dozulara isə hələ növbə çatmayıb.