”Mən fərd olaraq seçkiyə qatılıram, təşkilat adından yox”
Qarabağ Azadlıq Təşkilatının sədri Akif Nağı 11 aprel növbədənkənar prezident seçkisində iştirak edəcək.
Məlumatı Meydan TV-yə Akif Nağının özü verib.
O, Qarabağ Azadlıq Təşkilatının bu barədə qərar verdiyini deyib:
“Mən fərd olaraq seçkiyə qatılıram, təşkilat adından yox. Çünki bizim təşkilatın seçkilərdə iştirak hüququ yoxdur, sadəcə, təşkilat mənə seçkilərdə iştirak etmək icazəsi verib”.
Akif Nağı 1957-ci ildə Ağdam rayonunun Papravənd kəndində anadan olub. 1985-ci ildə Moskva Dövlət Universitetini bitirib, həmin ildən Azərbaycan Politexnik İnstitutun (indiki Texniki Universitet) tarix kafedrasında işləyib. 1991-ci ildə dissertasiya müdafiə etmiş, tarix elmləri namizədidir.
1993-cü ildə Qarabağ Azadlıq Hərəkatının idarə heyətinin üzvü, sonra həmsədri olub. 2000-ci ildə Qarabağ Azadlıq Hərəkatı Qarabağ Azadlıq Təşkilatına çevrilib və həmin zamandan təşkilatın sədridir.
2004-cü ilin iyun ayında erməni zabitlərinin Bakıya səfərinə etiraz olaraq aksiya keçirdib, həbs olunub. Həbsdə olduğu vaxt universitetdən uzaqlaşdırılıb.
Fevralın 5-də dövlət başçısı İlham Əliyev aprelin 11-də növbədənkənar prezident seçkisinin keçirilməsi haqda
sərəncam
imzalayıb.
Mərkəzi Seçki Komissiyası fevralın 14-də 5 nəfərin prezidentliyə namizəd olmaq üçün sənədlərini qəbul
edib
.
