Jurnalist qanunsuz olaraq 91 gün həbsdə saxlandığını iddia edir
Avqustun 24-də Səbail rayon Məhkəməsində jurnalist Xədicə İsmayılın Baş Prokurorluqdan kompensasiya iddiası üzrə məhkəmə prosesi keçirilib. “Azadlıq” qəzeti yazır ki, hakim Azər Tağıyevin sədrliyi ilə keçirilən prosesdə çıxışlar dinlənilib.
Xədicə İsmayılın nümayəndəsi Yalçın İmanov çıxış edib. Vəkil bildirib ki, müdafiə etdiyi şəxs 5 dekabr 2014-cü il tarixindən 6 mart 2015-ci il tarixinədək qanunsuz olaraq həbsdə olub: “5 dekabr 2014-cü il tarixində Xədicə İsmayıl barəsində Cinayət Məcəlləsinin 125-ci (intihar həddinə çatdırma) maddəsi ilə Səbail rayon Məhkəməsinin qərarı ilə həbs-qətimkan tədbiri seçilib. 91 gün keçəndən sonra ona digər maddələr üzrə ittiham verilib. Bakı Ağır Cinayətlər Məhkəməsinin 1 sentyabr tarixli hökmünə əsasən, Cinayət Məcəlləsinin 125-ci maddəsi üzrə bəraət hökmü çıxarılıb. Ali Məhkəmədə bu, təsdiqlənərək qanuni qüvvəyə minib. Bu da onun sübutudur ki, Xədicə İsmayıl Cinayət Məcəlləsinin 125-ci maddəsi üzrə 91 gün qanunsuz olaraq həbsdə olub. Bu müddətdə Xədicə İsmayıla həm maddi, həm də mənəvi zərər dəyib. Tutulan zaman Xədicə İsmayıl Azadlıq Radiosunda çalışıb və aylıq 2 min manat əməkhaqqı alıb. Saxlandığı 91 gün ərzində onun ailəsi yanına taksiylə gedib, mədəsindən əməliyyat olunduğu üçün ona dietik yeməklər aparılıb. Əlavə olaraq, onun hüquqlarını müdafiə edən mən və Fariz Namazlıya ödənişlər edilib. Bunların hamısı ümumi olaraq 9030 manat təşkil edir. Bu, Xədicə xanıma dəyən maddi ziyandı. Biz mənəvi zərər kimi isə 20 min manat tələb qoymuşuq. İddiamızın təmin edilməsini tələb edirik”.
Bakı şəhər Prokurorluğunun nümayəndəsi Günel Əkbərli bildirib ki, iddia ərizəsi əsassız olduğundan təmin edilməsin: “14 oktyabr 2014-cü ildə onun barəsində cinayət işi başlanıb. Zərərçəkən Tural Mustafayevin istintaqa verdiyi ifadələr və başqa sübutlar olduğundan barəsində həbs-qətimkan tədbiri seçilib. Ona görə də iddia təmin olunmamalıdır”.
Vəkil Y.İmanov məhkəməyə sənədlər təqdim edib. O, bildirib ki, Xədicə İsmayıl vergi ödəyicisi olub: “Vergilər Nazirliyinə sorğu ilə müraciət etmişik. Sorğumuza cavab olaraq bildiriblər ki, Xədicə İsamyıl 2011-2014-cü illərdə 103 min manat gəlir əldə edib və bundan 4 min sadələşmiş vergi verib. Bu, Xədicə İsmayılın gəlirlərinin nə qədər olmasından xəbər verir. Biz digər sənədləri də gələn prosesdə təqdim edəcəyik”.
Maliyyə Nazirliyinin nümayəndəsi də çıxışında iddianın təmin edilməməsini istəyib.
Məhkəmə prosesi sentayabrın 23-də davam edəcək.
X.İsmayıl iddia ərizəsində göstərib ki, 2014-cü il dekabrın 5-də CM-in 125-ci maddəsilə ittiham edilərək həbs olunub. O, 2015-ci il martın 6-dək məhz 125-ci maddə ilə həbsdə saxlanılıb. Jurnalist 91 gün qanunsuz olaraq həbsdə saxlandığı üçün Baş Prokurorluqdan 29 min 30 manat kompensasiya tələb edib.
