Müraciət müəllifləri təməl prinsiplərin bərpasını tələb edir
Vətəndaş Cəmiyyəti təmsilçiləri prezident İlham Əliyevə, hökumət üzvlərinə və Milli Məclisin deputatlarına müraciət edib. Müraciətdə 28 May Günü xatırlanaraq bildirilir ki, ali məqsədləri qarşılarına qoyan ADR-in qurucuları nəinki regionda, hətta bütövlükdə Şərq dünyasında demokratik dəyərlərin təcəssümü ilə seçilirdi. O zamankı hökumətdə inzibati zorakılıqlar və ya korrupsiya halları aşkara çıxarılan halda, ən yüksək vəzifəli şəxslər, Fətəlixan Xoyski kimi Cümhuriyyət qurucuları, nazirlər istefaya gedirdi: “Ötən 23 ildə Azərbaycan Sovet dövründən əvvəlki Respublikamızın ənənlərinə sadiq qalsaydı və hazırkı resursları düzgün idarə edə bilsəydi , heç şübhəsiz ki, müasir Azərbaycan dövləti, eyniylə təxminən 96 il əvvəl qurulan, bütün Şərqdə demokratikləşmə nümunəsi kimi regiondakı demokratikləşmə prosesinin lideri ola bilərdi”.
Müraciət müəllifləri narahatlıqları müşahidə edərək, diqqəti bu məsələlərə çəkməyə çalışıblar: Yerli və beynəlxalq hüquq-müdafiə təşkilatlarının rəyinə əsasən, alternativ, fərqli fikir bildirməyə və mövcud siyasətə etiraz etməyə görə, siyasi motivlərlə həbs edilənlərin sayına görə, Azərbaycan Şərq Tərəfdaşlığı ölkələri arasında birinci yerdədir; Beynəlxalq Şəffaflıq Təşkilatının açıqlamalarına görə, 2013-ci il Korrupsiya Qavrama İndeksinində Azərbaycan 28 balla dünyanın 177 ölkəsi arasında 127-ci sırada yer alıb. Son zamanlar korrupsiyanın qarşısını almaq üçün müəyyən addımlar atılsa da, onun yüksək səviyyədə olan siyasi və iqtisadi korrupsiyaya heç bir əhəmiyyətli təsiri olmayıb. Bu korrupsiyanın bir nəticəsi də ölkədə əməkhaqların aşağı olmasına görə işləyənlərin böyük bir hissəsinin başlıca yaşayış xərclərini ödəyə bilməməsidir. Avropaya İnteqrasıya İndeksi göstərir ki, bir vaxtlar bu prosesdə aparıcı rolu ilə seçilən Azərbaycan hazırda mövcud təbii resursların və insan kapitalı potensialının üstünlüyünə baxmayaraq, Şərq Tərəfdaşlığı ölkələri arasında Avropaya və Avro-Atlantika məkanına inteqrasiyanın aşağı səviyyəsi ilə seçilən Ermənistan və Belarus kimi dövlətlərlə eyni mövqedə dayanır.
Müraciətdə təxirəsalınmadan bu addımları atılması istənilir: Siyasi motivlərə görə həbs edilən məhbuslar dərhal azad edilsin; Fundamental insan haqları və azadlıqları – ifadə, birləşmək, toplaşmaq azadlıqları və özəl mülkiyyətin toxunulmazlığı təmin edilsin; Korrupsiya ilə, inzibatçılıqla ciddi mübarizə başlansın; azad sahibkarlığın inkişafı, daxili bazarda və xarici ticarətdə inhisarçılığın aradan qaldırılması üçün dövlət rəqabəti dəstəkləsin; QHT-lərin dövlət qeydiyyatının tələbi ləğv edilsin, vergi yükü azaldılsın və bu sahədə mövcud olan problemləri təznimləyən yüksək Avropa standartlarına cavab verən qanunlar qəbul edilsin; Azərbaycan Avropa İttifaqı ilə Assosiasiya Sazişini tezliklə imzalasın, Dünya Ticarət Təşkilatına daxilolma prosesini sürətləndirsin, NATO və Avropa Birliyinə üzvlük niyyətini açıqlasın.
Müraciətə tanınmış ictimai xadimlər, ziyalılar, hüquq müfadiəçiləri imza atıblar.
