Prezidentin fərmanı fevralın 1-dən icra olunmalıdır
Şəhid ailələri üçün nəzərdə tutulan prezident təqaüdü artırılır. Yanvarın 30-da prezident İlham Əliyev bununla bağlı fərman
imzalayıb.
Fərmanda deyilir ki, şəhid ailəsinin sosial müdafiəsini gücləndirmək və onlara dövlət qayğısını artırmaq məqsədilə Azərbaycan Respublikası Prezidentinin təqaüdünün aylıq məbləği artırılaraq 2019-cu il fevralın 1-dən 300 manat müəyyən edilib.
Nazirlər Kabinetinə bu fərmandan irəli gələn məsələləri həll etmək tapşırılıb.
Hazırda bu məbləğ 242 manatdır.
Yanvarın 28-də prezident və xanımı Mehriban Əliyeva şəhid ailələri ilə
görüşüb.
Görüşdə şəhid ailələrinə bildirilib ki, hərbi qulluqçuların vərəsələrinə birdəfəlik ödəmələrin verilməsi məsələsi ilə bağlı problemlər həll olunacaq.
Prezident İlham Əliyev ötən ilin aprelin 19-da “Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların ailə üzvlərinin sosial müdafiəsinin yaxşılaşdırılması ilə bağlı əlavə tədbirlər haqqında” fərman imzalayıb.
Fərmana əsasən şəhid hərbi qulluqçuların vərəsələrinə birdəfəlik ödəmələrin (11 min manat) verilməsi mexanizmini müəyyən edən Qaydaların layihəsi hazırlansa da, indiyə qədər bir çox şəhid ailəsi müavinətlərini ala bilmədiklərini deyirlər.
Buna etiraz edən ailələr bir neçə dəfə aksiya keçiriblər.