“Müalicəyə ehtiyacı olan hüquq müdafiəçisinin MTN təcridxanasında saxlanılan həyat yoldaşı Arif Yunusla görüşünə şərait yaradılmayıb”
Oktyabrın 21-də Milli Təhlükəsizlik Nazirliyində vəkil Elçin Qəmbərovun iştirakı ilə Leyla Yunusla bağlı istintaq hərəkətləri keçirilib.
Bu barədə vəkil Elçin Qəmbərov “Turan İA”-a bildirib ki, Leyla Yunus bu həftənin sonunadək 1 saylı Bakı İstintaq Təcridxanasına qaytarılacaq.
“Leyla Yunusun səhhəti yaxşı deyil, onun ciddi müalicəyə ehtiyacı var. Bu səbəbdən həbs qətimkan tədbiri ev dustaqlığı ilə əvəz edilməlidir”, – deyə vəkil bildirib.
Vəkilin dediklərinə görə, Leyla Yunusun MTN təcridxanasında saxlanılan həyat yoldaşı Arif Yunusla görüşünə şərait yaradılmayıb.
İyulun 30-da Leyla Yunusun barəsində üçaylıq həbs qətimkan tədbiri seçilib. O, Cinayət Məcəlləsinin 274-cü (dövlətə xəyanət), 213-cü (vergidən yayınma), 192-ci (qanunsuz sahibkarlıq), 320-ci (sənədlərin saxtalaşdırılması) və 178.3.2 (dələduzluq) maddələrilə təqsirləndirilir.
Həyat yoldaşı, tarixçi- alim Arif Yunus isə Cinayət Məcəlləsinin 274-cü (dövlətə xəyanət) və 178.3.2-ci (dələduzluq) maddələrilə təqsirləndirilir. Avqustun 5-də onun barəsində həbs qətimkan tədbiri seçilib.
Leyla və Arif Yunuslar ittihamları qəbul etməyərək siyasi sifariş kimi qiymətləndirirlər. Amnesty İnternational təşkilatı onları “vicdan məhbusu” elan edib.
