Mikayıl Talıbov böhtan cinayətində suçlu bilinmiş, onun üzərinə aylıq qazancının 20 faizini dövlət nəfinə ödəmək vəzifəsi qoyulmuş, həmçinin, 9 ay müddətinə islah işlərinə məhkum edilmişdi
Oktyabrın 3-də Şirvan Apellyasiya Məhkəməsində “Facebook işi” üzrə məhkəmə davası davam edib. Apellyasiya Məhkəməsi bu dəfə Facebook-dakı tənqidi ifadələrə cinayət cəzası kəsilməsini haqlı hesab edib.
Vəkil Xalid Ağaliyev Meydan TV-yə bildirib ki, apellyasiya instansiyası eyni predmet üzrə çıxardığı əvvəlki iki qərarında ifadə azadlığına dəstək vermiş, Facebook-da tənqidi düşüncələrini yayan Astara rayon sakini, keçmiş bank işçisi Mikayıl Talıbovun ifadələrinə cinayət məsuliyyətinə cəlb edilməsini nəzərdə tutan məhkəmə hökmünü ləğv etmişdi. “Facebook işi” ilə bağlı – Astara rayon Məhkəməsi 2013-cü ilin iyul ayında AccessBank-ın keçmiş işçisi Mikayıl Talıbovu internetdəki ifadələrindən dolayı cinayət məsuliyyətinə cəlb edən hökm çıxarmışdı. M.Talıbov AccessBank-dakı işindən çıxarılmasını qanunsuz sayırdı. O, facebook-da “Accessbank – Haqsızbank” adlı səhifə yaradaraq bankın işini sərt ifadələrlə qamçılamışdı. Bank həmin səhifəni defamativ məzmunlu sayaraq məhkəmədən M.Talıbovun böhtana görə məsuliyyətə cəlb olunmasını tələb etmişdi.
