Vəkil: “İstintaq orqanı məhkəməyə hər hansı sübut təqdim etmədi”
Nəsimi Rayon Məhkəməsi “Kanal 13” internet kanalının Bakı bürosunun rəhbəri Əziz Orucovun həbs müddətini daha 3 ay uzadıb. Bu barədə onun vəkili Elçin Sadıqov məlumat verib.
Vəkil qərardan apelyasiya şikayəti verəcək.
“Həbs müddəti dekabrın 17-dək uzadıldı. İstintaq orqanı həbs qətimkan tədbirinin uzadılması ilə bağlı məhkəməyə hər hansı bir sübut təqdim etmədi. Əziz Orucov məhkəmədə çıxış edərək istintaq orqanına etiraz etdi. O bildirdi ki, həbsdə olmasına, ümumiyyətlə, əsas yoxdur”, – E.Sadıqov deyib.
Əziz Orucova mayın 2-də Nəsimi Rayon Məhkəməsinin qərarı ilə 30 sutka inzibatı həbs cəzası verilib. O, İnzibati Xətalar Məcəlləsinin 535.1-ci (polisə müqavimət) maddəsi ilə ittiham edilib.
Ə.Orucovun inzibati cəzası başa çatan gün – iyunun 1-də ona cinayət ittihamı irəli sürülüb. Baş Prokurorluğun Ağır Cinayətlərə dair İşlər üzrə İstintaq İdarəsində Ə.Orucovun barəsində Cinayət Məcəlləsinin 192.2.2-ci (qanunsuz sahibkarlıq) və 308-ci (vəzifə saxtakarlığı) maddələri ilə cinayət işi açılıb.
Cinayət işi Ə.Orucovun təsisçisi olduğu “Qafqaz Media Təhqiqatları” İctimai Birliyi və “Kanal 13” ilə bağlıdır.
Jurnalist ittihamları qəbul etmir.
