Əkrəm Həsənov: “Əsas səbəb bank sisteminə etimadın sarsılmasıdır”
Əhali banklardan əmanətini geri götürür. Marja yazır ki, əmanətini geri götürməyə gələn müştərilərin sayı xeyli çoxalıb. Bəzi filiallar əmanəti dərhal geri qaytara bilmədikləri üçün müştəri ilə bank işçiləri arasında gərginlik yaranır:
“Əmanətçilər manatın günü-gündən dəyərdən düşməsindən narahatdır. Tam üzən məzənnəyə keçiddən sonra manatın dəyərdən düşməsinin daha da sürətlənməsi, USD/AZN məzənnəsinin tezliklə 2 manatı ötəcəyi barədə proqnozlar manat sahiblərini daha da narahat edir. Qısası, banklardakı manat təcili çıxardılaraq dollara çevrilir”.
Sayt yazır ki, bankların bir-birinin ardınca zərər açıqlaması, bu il bir neçə bankın bağlanacağının bəyan edilməsi də əmanətçiləri narahat edir. Hətta bankda dollar əmanəti olanlar da pullarını geri götürməyə başlayıblar.
Bank sahəsi üzrə ekspert, hüquqşünas Əkrəm Həsənov bunun səbəbinin müxtəlif olduğunu deyir. Bildirir ki, əvvəla, insanların gəliri azalıb. İşsizlik, qiymət artımı və s. əmanətləri çıxarıb xərcləməyə vadar edir. Əsas səbəb isə əlbəttə bank sisteminə etimadın sarsılmasıdır:
“Əmanətlərin sığortalanması sistemi ötən il bütövlükdə səmərəli fəaliyyət göstərdi: yəni sığortalanmış əmanətlər qaytarılır. Amma insanlarda bunun həmişə belə olmasına əminlik yoxdur. Digər tərəfdən, əmanətin sığortalanması hələ heç nə demək deyil. Adam tanıyıram ki, aylarla bankdan pulunu çıxara bilmir. O cümlədən xarici vətəndaşlar var ki, milyonlarla pulunu banklarımızdan geri götürə bilmir”.
Əkrəm Həsənov deyir ki, bu cür banklar bağlanmalıdır ki, Əmanətlərin Sığortalanması Fondu insanların pulunu qaytarsın:
“Amma bankı bağlamırlar. Nəticədə əmanət havada qalır. Bu xəbərlər təbii cəmiyyətdə yayılır və etimadı tam sarsıdır”.
Yanvarın 12-dən manat tam üzən məzənnəyə keçib. Həmin gündən manat dollar qarşısında 5 faizə yaxın dəyər itirib. Yanvarın 12-də 1.7742 manat səviyyəsində olmuş məzənnə yanvarın 23-dəki hərracda 1.8559 manat səviyyəsinədək qalxıb.
