Ələsgər Məmmədlinin və Ruslan İzzətlinin də evindən pul tapıldığı bildirilir
Vəkili Aqil Layıc deyir ki, Ələsgər Məmmədlinin evindən 7300 dollar pulun tapıldığı ittiham aktında qeyd olunub.
Ələsgər Məmmədli isə bu pulun əməliyyatçılar tərəfindən qoyulduğunu deyib.
Axtarış zamanı Ruslan İzzətlinin evindən də pul “tapılıb”. Onun həyat yoldaşı ayrı otaqda təcrid olunub və axtarış prosesini görməyib.
Xətai Rayon Məhkəməsi martın 6-da saxlanılan “Toplum TV”-nin videoredaktoru Müşfiq Cabbarla bağlı 4 ay həbs qətimkan tədbiri seçib. Əli Zeynal barəsində də məhkəmə qərarı ilə 4 aylıq həbs qətimkan tədbiri seçilib.
“Toplum TV” işi ilə əlaqədar saxlanılan jurnalist Fərid İsmayılov və NİDA üzvü Elmir Abbasov azadlıqdadır.
Bu barədə vəkil Zibeydə Sadıqova Meydan TV-yə deyib.
O bildirib ki, Fərid İsmayılov və Elmir Abbasov polis nəzarətinə verilərək sərbəst buraxılıblar.
Ələsgər Məmmədlinin mənzilində axtarış aparıldığı bildirilir.
Bu barədə məlumatı yaxınları “Facebook” sosial şəbəkəsində yayıblar.
III Respublika Platformasının Qurucu Heyətinin üzvü Ruslan İzzətlinin evində axtarış aparıldığı bildirilir.
Bu barədə məlumatı onun həyat yoldaşı Günel Manaflı yayıb. Onun sözlərinə görə, otaqdan çıxmasına icazə verilmir.
“Toplum TV” ilə bağlı həbslər davam edir
“Toplum TV” işi ilə bağlı yeni saxlanılanların olduğu bildirilir.
Hüquqşünas, “Toplum TV” saytının təsisçisi Ələsgər Məmmədli martın 8-də mülki geyimlilər tərəfindən “İstanbul” Klinikasının önündə saxlanılıb.
Bu barədə onun yaxınları sosial şəbəkələrdə məlumat paylaşıblar.
Toplum TV-nin baş redaktoru Xədicə İsmayıl III Respublika Platformasının üzvü Ruslan İzzətlinin də Xətai Rayon Polis İdarəsinin qarşısından qara maşına mindirilib aparıldığını bildirib. Güman edilir ki, o, Bakı Şəhər Baş Polis İdarəsinə aparılıb.
Ruslan İzzətli martin 6-da da saxlanılmışdı, lakin sonradan sərbəst buraxılmışdı.
Yeni saxlanılmalarla bağlı məlumatlara Daxili İşlər Nazirliyi (DİN) və başqa rəsmi qurumlardan münasibət almaq mümkün olmayıb.
Martın 6-da polis “Toplum TV”-nin ofisinə basqın edib, ofislə yanaşı saytın bir neçə əməkdaşının evində də axtarış aparılıb. Ofisdən 30 min avro, əməkdaşların evlərindən isə 2700, 3100, 20000 avro pul vəsaiti tapıldığı bildirilib.
Akif Qurbanova, Fərid İsmayılova, Müşfiq Cabbara, Əli Zeynala, Ramil Babayevə, Elmir Abbasova və İlkin Əmrahova 206.3.2 (qaçaqmalçılıq) ittihamı ilə cinayət işi açılıb.
