Portuqaliya və İngiltərə 1/4 finalda uduzub
Qətərdə keçirilən futbol üzrə dünya çempionatında dekabrın 10-da 1/4 final mərhələsinə yekun vurulub.
Əvvəlcə Portuqaliya millisi Mərakeşi sınağa çəkib. Saat 19:00-da başlayan oyunda Mərakeş yığması daha bir sürprizə imza atıb. 1/8 finalda İspaniyanı mundialdan kənarlaşdıran Afrika təmsilçisi bu dəfə Kriştiano Ronaldolu Portuqaliyanı minimal hesabla məğlub edib. Bununla da, mərakeşlilər yarımfinala vəsiqə qazanan növbəti komanda olub.
1/4 final mərhələsinin digər matçında İngiltərə və Fransa yığmaları üz-üzə gəlib. Saat 23:00-da start götürən qarşılaşmada Fransa millisi 2:1 hesabı ilə qələbə qazanıb.
1/4 finalın digər iki oyunu dekabrın 9-da keçirilib. Xorvatiya Braziliyanı, Argentina isə Niderlandı məğlub edərək, yarımfinala yüksəlib.
DÇ-2022, yarımfinal
13 dekabr
23:00 Argentina – Xorvatiya
14 dekabr
23:00 Fransa – Mərakeş
