Komanda qələbəyə də, qola da həsrət qalıb
Futbol üzrə Azərbaycan milli komandası bu gün UEFA Millətlər Liqasında növbəti oyununu keçirib.
Millətlər Liqasının 3-cü turu çərçivəsində keçirilən oyunda Azərbaycan millisi Slovakiya yığması ilə qarşılaşıb. Bakıdakı “Dalğa Arena”da keçirilən matçda azərbaycanlı futbolçular rəqibin hücumları qarşısında sadəcə 81 dəqiqə duruş gətirə biliblər. Slovakiya millisinin 81-ci dəqiqədə vurduğu qol oyunun taleyini həll edib – 0:1.
İtaliyalı baş məşqçi Canni De Byazinin rəhbrərlik etdiyi Azərbaycan millisi əvvəlki iki turda əvvəlcə Qazaxıstana uduzub (0:2), ardından Belarusla qolsuz heç-heçə edib. Milli komanda keçirdiyi üç oyunda qələbə qazanmaq bir yana, qol da vura bilməyib.
Azərbaycan yığması UEFA Millətlər Liqasında 4-cü turun oyununu da Bakıda keçirəcək. Milli komanda iyunun 13-də Belarus seçməsi ilə üz-üzə gələcək.
