Türkiyəyə səfər etmək istəyən turistlərin sayı artdıqca, biletlərin qiyməti də bahalaşır
Antalya müntəzəm aviareysi bərpa olunduqdan sonra biletlər orta hesabla 75,6 faiz bahalaşıb. “APA-Economics” xəbər verir ki, bu barədə “Aviakassa” onlayn agentliyinin hesabatına istinadən Rusiyanın turizm operatorları assosiasiyası məlumat yayıb.
Hesabat assosiasiyanın sifarişi ilə hazırlanıb.
Türkiyəyə səfər etmək istəyən turistlərin sayı artdıqca, biletlərin qiyməti də bahalaşır. Məsələn, Moskva-Antalya aviareysinə biletin qiyməti orta hesabla 75,5 faiz artıb. İyunun sonunda “Pegasus Airlines” aviaşirkəti ilə uçmaq istəyənlər (bir istiqamətdə) bileti 7,5 min rubla alırdısa, hazırda biletlər 30,7 faiz bahalaşaraq 9,8 min rubl olub. AZAL-ın biletləri isə 2,64 dəfə bahalaşaraq 13,5 min rubla çatıb. “Aeroflot” və “Turkish Airlines” aviaşirkətlərinin biletləri isə daha yüksək qiymətə tapılır. Belə ki, “Aeroflot”un xidmətlərindən yararlanaraq qeyd edilən istiqamət üzrə uçmaq istəyən 1 şəxs 21,4 min rubl, “Turkish Airlines”la uçmaq istəyən isə 48 min rubl xərcə düşəcək.
Sankt-Peterburqdan Antalyaya olan aviareyslərə biletlər isə orta hesabla 25 faiz bahalaşıb.
Moskva-İstanbul aviareysinin biletlərinin qiyməti 39 faiz artıb.
