Cahangir Əsgərov: “Bu qərar AZAL-a gələcək inkişaf üçün böyük imkanlar açır”
İyunun 20-də “Azərbaycan Hava Yolları” QSC (AZAL) Paris aviasalonunda təxminən 918 mln. dollar həcmində qiymətləndirilən dörd “Boeing 787-8 Dreamliner” təyyarəsi almaq niyyətini elan edib.
AZAL-ın mətbuat xidmətindən APA-ya deyilib ki, təyyarələrin sifarişi və tədarük tarixləri barədə məlumat tamamilə təsdiqləndikdən sonra “Boeing” korporasiyasının rəsmi saytında yerləşdiriləcək.
“Yeni “787-Dreamliner” təyyarələrinin sifarişi barədə qərar AZAL-a gələcək inkişaf üçün böyük imkanlar açır. Biz MDB məkanında aparıcı aviadaşıyıcılardan biri olaraq, müasir “Boeing 787″ təyyarələrinin bizə təqdim etdiyi imkanlar sayəsində marşrut şəbəkəmizin genişləndirilməsini səbirsizliklə gözləyirik”, – dövlət konserninin prezidenti Cahangir Əsgərov belə deyib.
“Boeing” korporasiyasının Yaxın Şərq, Türkiyə, Rusiya və Mərkəzi Asiyada satış məsələləri üzrə vitse-prezidenti Marti Bentrott isə bildirib ki, bugünkü saziş AZAL ilə tərəfdaşlıqda yeni səhifə açır:
“Əminik ki, bazarda lider olan “Boeing 787-8 Dreamliner” sərnişin təyyarələrinin səmərəliliyi və rahatlığı AZAL-ın aviaparkının müasirləşdirilməsi planlarına müvəffəqiyyətlə kömək edəcək”.
AZAL böyük aviadaşıyıcı və MDB ölkələrinin aviasiya icmasının liderlərindən biridir. Aviaşirkətin ümumi marşrut şəbəkəsi 25 ölkədə 40 istiqamətdən ibarətdir. 2016-cı ildə “Azərbaycan Hava Yolları” 2 milyondan çox sərnişin daşıyıb.
Hazırda aviaşirkətin donanmasına iki “Boeing 787-Dreamliner” təyyarəsi, həmçinin “Boeing 767” və “Boeing 757” təyyarələri daxildir.
