Növbəti mövsümündə futbol üzrə Avropa Liqasının finalı Azərbaycanda keçiriləcək.
UEFA İcraiyyə Komitəsinin islasında qəbul olunan qərara əsasən, final oyunu Bakı Olimpiya Stadionunda (BOS) baş tutacaq.
Çempionlar Liqasının final görüşü isə İspaniyanın Madrid şəhərində yerləşən “Metropolitano” stadionunda baş tutacaq. UEFA-ya üzv olan 55 milli assosiasiyanın, o cümlədən AFFA nümayəndələrinin də iştirak etdiyi Konqres Cenevrənin “Prezident Vilson” otelində baş tutub. Lakin Azərbaycan üçün daha önəmli qərar İK-nın Nyondakı Avropa Futbol Evində təşkil olunan toplantısında verilib. Bir sıra vacib məsələləri müzakirə edən komitə üzvləri 2019-cu ildə keçiriləcək Çempionlar Liqası, Avropa Liqası və UEFA Super Kubokunun final oyunlarına ev sahibliyi edəcək stadionların adına aydınlıq gətiriblər.
“Komanda.az” yazır ki, finala iddiaçılar arasında ilk dəfə Azərbaycan da vardı. Bakı Olimpiya Stadionu həm Çempionlar Liqası, həm də Avropa Liqasının 2018/19 mövsümünün həlledici görüşünə namizəd idi. Qitənin ən nüfuzlu klub turnirində bu matça iki iddiaçı vardı ki, Bakının da yeganə rəqibi Madridin “Vanda Metropolitano” stadionu idi. Avroliqada isə Bakı Olimpiya Stadionunun iki rəqibi vardı. Burada da onlardan biri İspaniyanı təmsil edirdi. Sevilyanın “Ramon Sançes Pisxuan” stadionu, həmçinin İstanbulun “Vodafon Park” arenası ikinci dərəcəli turnirə iddiaçı idi.
Öncə UEFA Super Kubokunun hansı şəhərdə keçiriləcəyi müəyyənləşib. UEFA 2019-cu ilin Super Kubok matçının İstanbuldakı “Vodafon Park Arena”da keçirilməsinə qərar verib. Avroliqanın final qarşılaşmasını
Bakı Olimpiya Stadionuna həvalə edən qitə futbol qurumu ÇL-in həlledici matçını da Madridin “Vanda Metropolitano” stadionuna təyin edib.
“Marca” qəzetinin yazdığına görə, UEFA prezidenti Aleksander Çeferin rəsmi qərarı mətbuat konfransında açıqlayacaq.
UEFA-ya göndərilmiş sifariş ərizəsində BOS-un tamaşaçı tutumu 70 055 nəfər göstərilib.
