Mühacirətdən qayıdan müsavatçının şikayəti təmin olunmadı
Bakı Apelyasiya Məhkəməsi oktyabrın 30-da müsavatçı Azad Həsənovun birinci instansiya məhkəməsinin həbs qətimkan tədbiri haqda qərardan şikayətə baxıb.
Məhkəmə qapalı keçirilib.
Bu barədə Meydan TV-yə məlumat verən Müsavat Partiyasının başqanı Arif Hacılı deyib ki, gözlənildiyi kimi məhkəmə Azad Həsənovun haqqında həbs qətimkan tədbirinin seçilməsi ilə bağlı birinci instansiya məhkəməsinin qərarını qüvvədə saxlayıb.
Azad Həsənov Cinayət Məcəlləsinin 234.4.3-cü (narkotik vasitələri hazırlama, əldə etmə, saxlama, göndərmə, daşıma və ya satma) maddəsi ilə ittiham edilir. Cinayət işini Bakı Şəhər Baş Polis İdarəsi aparır. İttiham sübuta yetirilərsə, A.Həsənovu əmlakı müsadirə olunmaqla 5 ildən 12 ilədək həbs gözləyir.
Litvada siyasi mühacir həyatı yaşayan
Azad Həsənov
oktyabrın 10-da ağır xəstə olan atasına baş çəkmək üçün Bakıya gəlib.
Sərhədi problemsiz keçən A.Həsənov oktyabrın 11-də mülki geyimli şəxslər tərəfindən saxlanılıb.
O, Müsavat Partiyasının üzvüdür. Partiya onun saxlanılması ilə əlaqədar olaraq oktyabrın 12-də bəyanat yayıb.
