”Işgəncəyə məruz qalanlar təcili müalicə olunmalıdır”
“Azərbaycan hökumətini Taleh Bağırzadə və digər 17 nəfərin ədalətli məhkəmə hüququnun pozulmasını və işgəncə faktlarını araşdırmağa çağırırıq”.
“Turan”-ın məlumatına görə, “Amnesty İnternational” beynəlxalq təşkilatının sənədində deyilir ki, işgəncə altında alınan ifadələr sübut kimi qəbul oluna bilməz və həmin şəxslər azad edilməlidir.
Təşkilat həmçinin hesab edir ki, dindarları işgəncəyə məruz qoyan şəxslər məsuliyyətə cəlb olunmalı, həbs zamanı işgəncəyə məruz qalan Cahad Babakişiyev, Şamil Abdullayev və Bəhruz Əsgərov təcili müalicə olunmalıdır.
“AXCP sədrinin müavini Fuad Qəhrəmanlı qeyd- şərtsiz azad edilməlidir. Çünki o, fikrin ifadə olunması hüququna görə həbs olunub. Təşkilat onu vicdan məhbusu elan edib” – bəyanatda deyilir.
Bakı Ağır Cinayətlər Məhkəməsində Əlövsət Abbasovun sədrliyilə “Müsəlman Birliyi” təşkilatının lideri Taleh Bağırzadənin və digər 17 müttəhimin barəsində hökm çıxarılıb.
T.Bağırzadə hakimiyyətin zorla ələ keçirilməsinə və konstitusiya quruluşunun dəyişdirilməsinə hazırlıqda ittiham olunaraq 20 il azadıqdan məhrum edilib. AXCP sədrinin müavini Fuad Qəhrəmanlı isə 10 il azadlıqdan məhrum edilib. Digərlərinə uzunmüddətli həbs cəzası verilib.
