Onlar aksiyaya çağırış etməkdə günahlandırılırlar.
Avqustun 24-də Mingəçevirdə keçirilən etiraz aksiyasında iştirak etmiş daha iki nəfər həbs edilib. Hazırda Mingəçevirdə olan Meydan TV əməkdaşı onların kimliyini müəyyənləşdirə bilib. Bunlar – Mehman Qaçay oğlu və İlkin adlı şəxsdir. Yaxınlarının verdiyi məlumata görə, İlkin yol gedərkən saxlanılıb və maşına mindirilərək Mingəçevir şəhər Polis Şöbəsinə aparılıb. İlkin məlumata görə, hər iki şəxsin iştirakı mediada yayımlanmış videogörüntülərdən müəyyənləşib, onlar aksiyaya çağırış etməkdə günahlandırılırlar.
Avqustun 20-də axşam saatlarında saxlanılaraq Mingəçevir şəhər Polis Şöbəsinə gətirilən Bəhruz Hacıyev orada ölüb. Onun özünü 3-cü mərtəbədən atdığı bildirilir. Lakin valideynləri deyilənlərlə razılaşmır, Bəhruz Hacıyevin intihar etməsinə inanmırlar. Avqustun 22-də şəhər sakinləri hadisəyə etiraz əlaməti olaraq Polis Şöbəsinin qarşısında aksiya keçiriblər. Aksiyada 500-dək adam iştirak edib. Mingəçevir Polis Şöbəsinin rəisi Ələsgər Bədəlov Meydan TV-yə bildirib ki, aksiya zamanı 10 nəfər polis əməkdaşı yaralanıb, 21 aksiyaçı həbs edilib. Həbs edilənlər arasında Bəhruz Hacıyevi dindirməyə hazırlaşan polis baş leytenantı Şahlah Şahlarzadə də var.