Source: Meydan TV

“Mehriban Əliyevaya yazılan şikayətlər başqa qurumlara yönləndirilir”

Şabranın Çölquşçu kənd sakini Ədalət Əmiraslanov 14 il əvvəl daun sindromu ilə doğulub. Anası Xatirə Rəsulova onu həyatda saxlamaq üçün vargücü ilə mübarizə aparır.

“Bizi aldatdılar”

54 yaşlı qadın taleyindən danışır. Dediyinə görə, ailəsi Şabrana 1988-ci ildə Gədəbəydən gəlib: “Başkəndə yaxın qalırdıq. Ermənilər imkan vermədi yaşamağa. Anam şabranlı idi deyə, elə bu rayona gəldik. Atam Çölquşçu kənd məktəbində işləməyə başladı“.

Xatirə Rəsulova gec ailə həyatı qurduğunu, evlənəndə özünün də xəstə olduğunu xatırlayır: “Bu uşaq da gəlib belə doğuldu. Müalicəsi yoxdu. Mən bunu bilmirdim. Bizi aldatdılar. Nə qədər xərc çəkdik. Sağalmayacaqdısa, gərək mənə düzünü deyəydilər. Bir gün ayıldım. İndi harası ağrıyırsa, yalnız onun dalınca gedirik. Məsələn, ödü, bağırsağı…”

Əslində, Ədalətin ağrıyan yeri çoxdur. Revmatizmdən əziyyət çəkir, ürəyindən müalicə alır. Üstəlik, psixiatr yanına getməlidir...

“Nə qədər qızılım vardısa, hamısını satdım”

Xatirə Rəsulova həyat yoldaşını üç ildir itirib. Onun müalicəsi üçün də az mübarizə aparmayıb: “2009-dan xəstə idi. İllərlə pul xərclədik, çoxlu borca girdik. Nə qədər qızılım vardısa, hamısını satdım”.

Ailənin illərlə yığılan borcları pandemiya dövründə azalıb. Xəstəlikdən əziyyət çəkən yeniyetmə və ananın ağır vəziyyətdə olduğunu görən tanışlar bu haqda sosial şəbəkələrdə yazmağa başlayıblar. Xeyli yardım toplanıb. Kömək etmək istəyənlər yığışıb Çölquşçuda ailəyə birotaqlı koma da qaraldıb: “Borclar o insanların sayəsində azaldı. İndi cəmi 1700 manat qalıb”.

“Dırnağını tutdurmağa 50 manat vermişəm”

Xatirə xanım deyir ki, Ədalətin müalicəsinə çox pul lazım olur. Ailəyə isə cəmi 200 manat müavinət verilir. Qadın bu pulla xəstəxana xərclərini ödəməyin mümkünsüzlüyünü bildirir.

“Dövlət xəstəxanalarında da pulunuz çıxır?” sualına qadın pəjmürdə cavab verir: “Bəs necə?! Pulsuz kim üzümüzə baxar? Özəl klinikalara üz tutursan, giriş azı 50 manat. Xəstə uşaqdı, qorxur, imkan vermir dırnağını tutmağa. Bir ildir dırnaqları uzanır. O gün təkcə narkozla dırnağını tutdurmağa 50 manat vermişəm”.

Xatirə xanım ailənin xərclərini ödəmək üçün işləməyə hazırdır. Amma Ədalətə onsuz baxan olmayacaq. Heç pandemiya dövründə iş tapması da inandırıcı görünmür. Xərclər isə az deyil. Qadın deyir ki, ayda təkcə oğlunun pampersinə 100 manat xərcləyir.

“İcra Hakimiyyətinə nə qədər getmək, yazmaq olar?”

Ədalət müavinət alır deyə ailə karantin günlərində işsizlərə verilən 190 manatdan məhrum olub. Xatirə Rəsulova sosial yardım almaq üçün bütün sənədləri hazırladığını söyləyir. İndi gözü yoldadır.

“Gözləyirik. Elə bilməyin ki, həmişə əlimi yana salmışam, çalışmamışam. Müraciət etmədiyim yer qalmayıb. Ev üçün nə qədər getmişəm. Rayonun deputatı olmuş Tahir Süleymanovu heç cür tapa bilmədim. İllərlə seçilirdi, ortada görünmürdü. Deputatsan, heç olmasa, dərdimizə qulaq as. Azərbaycan varlı dövlətdi, amma xəstə nə vəziyyətdə yaşayır. İcra Hakimiyyətinə nə qədər getmək, yazmaq olar? Yorulmuşam artıq”, - qadın danışır.

Xatirə xanım Birinci vitse-prezident Mehriban Əliyevaya da dəfələrlə müraciət etdiyini deyir. Amma cavab məktubu hansısa dövlət orqanına yönəldilir, orada isə heç bir iş görmürlər: “Buna görə də bir dəfə hirslənib bütün kağızları yandırdım”.

Xatirə Rəsulova Şabranın yeni deputatı Sadiq Qurbanovla görüşə biləcəyinə çox ümid bəsləmir, amma onu da axtaracaq...

Şabran Rayon İcra Hakimiyyətindən Meydan TV-yə bildirilib ki, qurumun vətəndaşların sosial problemlərini həll etməsi üçün ayrıca büdcəsi yoxdur. Bunun üçün vətəndaş əlaqədar qurumlara üz tutmalıdır. Bayram günləri olduğundan Əmək və Əhalinin Sosial Müdafiəsi Nazirliyindən münasibət öyrənmək mümkün olmayıb.

While you are here …

We have a small favor to ask of you. In an environment where information is under tight government control, Meydan TV works hard to ensure that people have access to quality independent journalism. We shed light on stories you might otherwise not read because we believe that those who cannot speak up deserve to be heard, and those in power need to be held accountable. We invest considerable time, effort and resources to do so, which is why we need your help.

Your support empowers our courageous journalists, many of whom work at great personal risk to freedom and safety. Every contribution to the protection of independent journalism in Azerbaijan matters. Thank you.

SUPPORT US
Featured in:  
Shortlink:   http://mtv.re/0n7ape

Most Viewed