Keçmiş qərargah rəisinin villasına həbs qoyuldu
“Əgər sən mənim pulumu qaytarmırsansa, al, bu yaylığı başına bağla… Sən də mənim kimi arvad ol. Belə kişi kimi gəzərlər? Papağı başına niyə qoyubsan?”
Bu sözləri məhkəmə prosesində zərərçəkmiş Validə Quliyeva təqsirləndirilən şəxsə deyib. O, çantasından yaylıq çıxararaq, mühakimə edilən Əlövsət Məhərrəmova uzadıb.
Bakı Ağır Cinayətlər Məhkəməsində hakim Rahib Salmanovun sədrliyi ilə özünü Fövqəladə Hallar Nazirliyinin (FHN) polkovniki kimi təqdim edərək, onlarla vətəndaşdan işə düzəltmək adı ilə külli miqdarda pul almaqda günahlandırılan Əlövsət Məhərrəmovun məhkəmə prosesi keçirilib.
Hakim təqsirləndirilən şəxsi təhqir etdiyi üçün Validə Quliyevaya xəbərdarlıq edərək növbəti belə hərəkətə yol verərsə, məhkəmə zalından çıxarılacağını söyləyib.
“Musavat.com” xəbər verir ki, zərərçəkmişlər vəsatətlə çıxış edərək Əlövsət Məhərrəmovun villasına həbs qoyulmasını istəyiblər. Ə.Məhərrəmova işə düzəlmək adı ilə 8-12 min manat arasında pul verən zərərçəkmişlər dəymiş zərərin ödənilmədiyini və həmin villaya həbs qoyulmasını tələb ediblər.
Məhkəmə vəsatəti müşavirədə müzakirə edərək qərarı elan edib. Məhkəmənin qərarı ilə Əlövsət Məhərrəmovun Novxanıda olan villasına həbs qoyulub. Məhkəmədə məlum olub ki, həmin ev Əlövsət Məhərrəmovun oğlunun adınadır. Zərərçəkmişlər deyir ki, Əlövsət Məhhərrəmov evi onlardan aldığı pulla tikib. Amma təqdirləndirilən şəxs buna etiraz edib.
Hakim Əlövsət Məhərrəmova xatırladıb: “Siz istintaqda demisiniz ki, əldə etdiyimiz pullarla həmin evi tikmisiniz. İndi niyə bunu inkar edirsiniz?”
Əlövsət Məhərrəmov belə bir ifadə vermədiyini deyərkən zərərçəkmişlər etiraz edərək ondan soruşublar: “Bəs bu qədər pulu haradan almışdınız?”
Növbəti məhkəmə prosesi mayın 15-nə təyin edilib. İş üzrə şahid olan şəxslər məhkəməyə məcburi gətiriləcək.
2015-ci ilin fevralında həbs edilən Əlövsət Məhərrəmov özünü FHN polkovniki kimi təqdim etsə də, o, əslində “Azərbaycan Dəmir Yolları” QSC-nin Bakı Dəmir Yolu Qovşağı Mülki Müdafiə Qərargahının rəisi vəzifəsində çalışıb. Onun həbsindən sonra “Azərbaycan Dəmir Yolları” QSC rəhbərliyinin göstərişi ilə adıçəkilən qərargah ləğv edilib.
İstintaq materiallarına görə, onun vətəndaşları aldatması halları isə 2014-cü ilin sonlarında edilən çoxsaylı şikayətlərdən sonra məlum olub. Ə.Məhərrəmov ötən ilin fevralında həbs edilib. Onun barəsində Cinayət Məcəlləsinin 178-ci (dələduzluq) maddəsi ilə cinayət işi açılıb. Nəsimi Rayon Məhkəməsində Ə.Məhərrəmov barəsində 2 ay müddətinə həbs-qətimkan tədbiri seçilib. Sonradan həbs-qətimkan tədbirinin müddəti uzadılıb. Bu iş üzrə zərərçəkmişlərin sayının 90 nəfərə yaxın olduğu bildirilir.
