Lökbatan qəsəbəsi

Mənbə: Meydan TV

Başlıq: Lökbatan qəsəbəsi

Yolsuz məhəllə

Məqalə yeniləndi:  26 Noyabr 2020

“Ərazidə məmur evi olsaydı, evin sənədini bəhanə etməzdilər”

Bu şəkillər paytaxtın Qaradağ rayonu, Lökbatan qəsəbəsi, 2-ci yaşayış massivində çəkilib. Massivin 6-cı keçid adlandırılan ərazisində yaşayanlar hər gün avtobus dayanacağınadək kilometrlərlə yolu piyada getmək məcburiyyətindədirlər. Çünki yol bərbad vəziyyətdə olduğundan nəinki marşrut avtobusu, hətta taksilər də işləmir.

Sakinlərdən Aydın Məmmədov bildirib ki, ərazidə 100-dən çox ev var. Təxminən 20 il əvvəl məcburi köçkünlər də bu ərazidə məskunlaşıblar. Dəfələrlə şikayət etsələr də, yola asfalt örtüyü çəkilmir:

“Ötən il Qaradağ Rayon İcra Hakimiyyəti tərəfindən yola daş-çınqıl töküldü. Amma indi həmin daşlar da palçığa qarışıb, yol keçilməz olub”.

"Dəfələrlə şikayət etsələr də, yola asfalt örtüyü çəkilmir"

"Dəfələrlə şikayət etsələr də, yola asfalt örtüyü çəkilmir"

Mənbə: Meydan TV

Şikayətçilər bildiriblər ki, yağışlar başlayan kimi gölməçələr, bataqlıq yaranır, ətraf palçıq olur:

“Halımıza baxın, yayda dayanacağa kimi taksi ilə gedirik. Payız-qış aylarında isə taksi çağırırıq, bu ünvanı eşidən kimi imtina edirlər. Gərək rezin çəkmə geyək magistral yola qədər piyada gedək. Çünkü maşın palçığa batıb qalır. İlin-günün bu vaxtında hətta dağ kəndlərində belə bu cür yol qalmayıb. Məhəllə sakinlərinin yolun nə vaxtsa təmir ediləcəyinə ümidi də yoxdur”.

"Payız-qış aylarında isə taksi çağırırıq, bu ünvanı eşidən kimi imtina edirlər"

"Payız-qış aylarında isə taksi çağırırıq, bu ünvanı eşidən kimi imtina edirlər"

Mənbə: Meydan TV

Yol bərbad vəziyyətdə olduğundan təcili tibbi yardım maşınları da əraziyə çağırışa gələ bilmir. Sakinlərdən biri danışıb ki, ağır xəstə üstünə həkim çağırıblar, yarı yolda düşüb, sakinlərin köməyi ilə piyada ünvana çatıblar:

“İcra hakimiyyəti, Lökbatan bələdiyyəsi hər il bir bəhanə irəli sürür. Guya ki ərazidəki evlərin çoxunun sənədi yoxdur. Belə çıxır ki, yolun bu vəziyyətdə olmasında sakinlər günahkardılar. Sabah hamı evini sənədləşdirsə, yola asfalt çəkiləcək? Bu bəhanədir. Ərazidə məmur evi olsaydı, evin sənədini bəhanə etməzdilər”.

Qaradağ Rayon İcra Hakimiyyətindən sözügedən ünvandakı yolun bərbad vəziyyətindən xəbərdar olduqlarını, yaxın gələcəkdə tədbir görüləcəyini deməklə kifayətləniblər. Lökbatan bələdiyyəsindən isə şikayətə münasibət bildirmək istəməyiblər.

"İlin-günün bu vaxtında hətta dağ kəndlərində belə bu cür yol qalmayıb"

"İlin-günün bu vaxtında hətta dağ kəndlərində belə bu cür yol qalmayıb"

Mənbə: Meydan TV

2-ci yaşayış massivi

2-ci yaşayış massivi

Mənbə: Meydan TV

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Məqalə yeniləndi:  26 Noyabr 2020
Bölmələr:  
qısa linklər:   http://mtv.re/jgetz9

Ən çox baxılan