“Biz avtoritarizmə baş əyməyənlərin yanındayıq”
Türkiyədə bir qrup fəal Azərbaycanda saxlanmış gənc fəallar Bayram Məmmədov və Qiyas İbrahimovun həbsinə etiraz açıqlaması yayıblar. Onlar hər iki gəncin rejimə etirazlarını dəstəklədiklərini bildirirlər.
Məlumatı Azadlıq Radiosu yayı.
«B.Məmmədov və Q.İbrahimov avtoritarlığa baş əymədilər, Heydər Əliyevin heykəlinin üzərinə «Qul bayramınız mübarək» şüarı yazdılar. Avtoritar rejimi müdafiə edənlər bu fərqli siyasi səslərin eşidilməməsindən ötrü onları həbsə aldı. Biz avtoritarizmə baş əyməyənlərin yanındayıq».
Anarxistlərin qurumu olan ABC İstanbul-dan fəallara dəstək mətni ünvanlanıb. Türkiyəli anarxistlər həbs olunan gəncləri tək buraxmayacaqlarını bəyan ediblər.
NİDA-çı Bayram Məmmədov və gənc fəal Qiyas İbrahimov mayın 10-da axşam saxlanılıblar. Gənclərin Nərimanov rayon Polis İdarəsi yanında Müvəqqəti Saxlanma Yerində olduqları yalnız mayın 12-də bilinib. Mayın 12-də Xətai rayon Məhkəməsi barələrində 4 aylıq həbs-qətimkan tədbiri seçib.
Daxili İşlər Nazirliyi gənclərin yaşadıqları mənzillərin hər birindən 1 kq heroin tapıldığı haqda məlumat yayıb və gənclər qanunsuz narkotik dövriyyəsində ittiham ediliblər. Gənclər isə həbslərinin səbəbini keçmiş prezident Heydər Əliyevin heykəli üzərinə etirazçı şüarlar yazmaqlarında görürlər.
Gənclərin vəkili Elçin Sadıqov hər iki gəncin saxlanılarkən işgəncələrə məruz qaldığını bildirib. Amma Ombudsman Aparatının Preventiv qrupu xəsarət izi aşkarlamadığı haqda açıqlama yayıb.
