Zakir Sultanov: Həmin ünvanda yerləşən obyekt məscid yox, yaşayış evi kimi səhvən qeydiyyata alınmışdı
Azərbaycan Mədəniyyət və Turizm Nazirliyi Mustafa Sübhi küçəsi, 63 ünvanında yerləşən qədim məscidin sökülmə işlərini dayandırıb.
Bu barədə ANS-ə Azərbaycan Respublikası Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov deyib.
Onun sözlərinə görə, həmin ünvanda yerləşən obyekt məscid yox, yaşayış evi kimi səhvən qeydiyyata alınmışdı. “Amma məscidin sökülməsi ilə bağlı məktub idarəmizə daxil olan kimi hadisə ilə maraqlandıq.
Binanın söküntü işləri heç başlamamışdan, bu işləri dayandırdıq. Bu il Mədəniyyət və Turizm Nazirliyinin təqdimatı üzrə bina məscid kimi tarixi-mədəni əhəmiyyət kəsb edən və mühafizə edilən obyektlər siyahısına daxil edilib”.
“Sovetski”də təxminən 171 tarixi abidə var ki, bunun 76-sı ötən ildən, 23-i isə bu ilin mayından Nazirlər Kabinetinin və nazirliyin qərarı ilə tarixi əhəmiyyətə malik olmadığından sökülməsi qərarı verilib.
Amma iki gün öncə Bakı sakinləri tarixi abidələrin sökülməsi ilə bağlı petisiya yaratdılar. Petisiya Nazirlər Kabineti, Mədəniyyət və Turizm Nazirliyi, Bakı Şəhər İcra Hakimiyyətinə göndəriləcək.
