Şirkət rəsmiləri bu həftə Afinada 66 faizlik hissənin özəlləşdirilməsi haqqında müzakirə aparacaqlar
Yunanıstanın qazpaylayıcı operatoru olan DEFSA şirkətində pay alınması məsələsinin həlli üçün SOCAR-ın nümayəndə heyəti bu həftə Afinaya rəsmi səfər edəcək.
“APA-Economics”
yunan mətbuatına
istinadən xəbər verir ki, səfər çərçivəsində iki əsas məsələ müzakirə mövzusu olacaq – SOCAR-ın DESFA-dakı payı və qazpaylayıcı şirkətin qiymətləndirilməsi metodologiyası.
Mətbuat iddia edir ki, danışıqlar olduqca gərgin ab-havada keçəcək.
euractiv.com
saytı iyulun 20-də yazıb ki, alqı-satqı əməliyyatının bugünədək reallaşmamasının səbəbi onunla bağlıdır ki, Avropa Birliyinin (AB)anti-inhisar narahatlıqlarını aradan qaldırmaq üçün SOCAR DESFA-dakı payının 17 faizindən üçüncü tərəfin xeyrinə imtina etməlidir.
DESFA-nın SOCAR tərəfindən özəlləşdirilməsi məsələsinə Avropa Komissiyasının Rəqabət üzrə Baş Direktorluğunda baxılır. 2013-cü il iyulun 31-də Yunanıstanın Dövlət Əmlakının İdarə Edilməsi Fondu (Hellenic Republic Asset Development Fund, HRADF) DESFA-nın 66 faizlik səhm paketinin SOCAR tərəfindən 400 mln. avroya alınmasına dair sövdələşməni təqdir edib.
2013-cü ilin dekabrında SOCAR ilə Yunanıstanın Dövlət Özəlləşdirmə Fondu və “Petroleum” şirkəti arasında “Səhmlərin Alqı-Satqı Müqaviləsi” və “Səhmdarlar haqqında Müqavilə” imzalanıb. SOCAR DESFA-nın səhmlərinin 31 faizini Yunanıstan hökumətindən, 35 faizini “Hellenic Petroleum SA” şirkətindən alır. DESFA üzərində nəzarətin SOCAR şirkətinə verilməsinə qədər Yunanıstan şirkətinin səhmlər paketinə HRADF tərəfindən nəzarət edilir.
Ötən həftə isə Yunanıstanın energetika naziri Panos Skourltis DESFA-nın qiymətləndirmə metodologiyasına dəyişiklik edilməsi ilə bağlı qanun layihəsinə dəyişikliklərin olunmasını təklif edib. Qaz tarifləri ilə bağlı qanun layihəsinə dəyişiklik qüvvəyə minsə, bu, gələcəkdə SOCAR-ın gəlirliliyinin əhəmiyyətli dərəcədə azalmasına səbəb olacaq. P. Skourletis onu da qeyd edib ki, dəyişikliklər yerli qaz bazarının qorunması üçün vacibdir. Onun sözlərinə görə, bunlar Yunanıstan və Avropa qanunvericiliyinə tam uyğundur və özəlləşdirmə prosesi ilə heç bir əlaqəsi yoxdur.
