Ailənin yeganə qazanc mənbəyi olan, onun işlətdiyi baytarlıq aptekini bağlayıblar
Göyçayda şərlənərək həbs olunmuş hüquq müdafiəçisi, siyasi məhbus Taleh Xasməmmədovun ailə üzvlərinə təzyiqlər başlayıb. Bu barədə məlumatı hüquq müdafiəçisi Oqtay Gülalıyeva məhbusun qardaşı Valeh Xasməmmədov bildirib.
Məlumata görə, Valeh Xasməmmədovun, ümumiyyətlə, ailənin yeganə qazanc mənbəyi olan, onun işlətdiyi baytarlıq aptekini bağlayıblar. Aptekin bağlanması Kənd Təsərrüfatı nazirliyinin Baytarlıq Xidmətinin və yerli icra qurumlarının xətti ilə həyata keçirilib. Maraqlıdır ki, “aptek bağlama” əməliyyatının səbəbləri barədə məhbus ailəsinə hər hansı məlumat verilməyib.
Yerli mənbələrin verdiyi məlumata görə Göyçayda fəaliyyət göstərən baytarlıq apteklərinə nəzarəti Göyçay Baytarlıq xidmətinin rəisi Hacıyev Ağadadaş həyata keçirir. Hacıyev Ağadadaş rayon baytarlıq apteklərinə nəzarəti öz qohumları vasitəsi ilə təşkil edir və bu işə rəhbərlik edən onun qardaşı Qiyas Hacıyevin və oğlu Orxan Hacıyevin də öz baytarlıq aptekləri var.
Göyçay rayon icra hakimiyyətinin başçısı Mübariz Ağayevin göstərişi ilə şərlənib həbs olunduğu bildirilən hüquq müdafiəçisi Taleh Xasməmmədovun məhkəməsi iyun 2-nə təyin olunsa da, naməlum səbəblərdən 16 iyuna təxirə salınıb. T. Xasməmmədovun məhkəməsinin səbəbsiz olaraq təxirə salınması, uzadılması onun ailə üzvləri tərəfindən narahatlıqla qarşılanır.
