Sirac Kərimlinin həbs müddəti uzadılıb

“Adətən belə praktika xüsusilə mürəkkəb hal olduğunda tətbiq edilir, Siracın işində heç bir mürəkkəblik yoxdur”

Source:


“Adətən belə praktika xüsusilə mürəkkəb hal olduğunda tətbiq edilir, Siracın işində heç bir mürəkkəblik yoxdur”

Dekabrın 13-də Nərimanov Rayon Məhkəməsi Amnesty International tərəfindən “vicdan məhbusu” kimi tanınan Sirac Kərimlinin həbs müddətini daha iki ay – fevralın 17-dək uzadıb.

Xatırladaq ki, S.Kərimli iyulun ortalarında həbs olunub. Bir həftə sonra isə onun qardaşı, Müsavat Partiyasının fəalı Fərəc Kərimli həbs olunub. Qardaşlar narkotik maddə alverində ittiham olunurlar.

Onların atası Raqif Kərimli də Müsavat Partiyasının fəalıdır.

Yerli hüquq müdafiəçiləri Kərimli qardaşlarını siyasi məhbuslar hesab edirlər.

Vəkil Nemət Kərimli “Turan İA”-a bildirib ki, ikinci dəfədir ki, S.Kərimlinin həbs müddəti əsassız olaraq uzadılır.

“Adətən belə praktika xüsusilə mürəkkəb hal olduğunda tətbiq edilir. Siracın işində heç bir mürəkkəblik yoxdur. Onu siyasi girov kimi saxlayırlar. Sirac siyasətlə məşğul olmur. O, qardaşına və atasına görə həbs olunub”, – deyə vəkil bildirib.

Vəkil Siracın səhhətinin pisləşdiyini bildirib. Onda kəskin ürək ağrıları olur. Ədliyyə Nazirliyinin Tibb İdarəsinin həkimləri Siracı müayinə ediblər və bəzi dərmanlar yazıblar. Lakin bu müalicənin faydası yoxdur.

“Biz Siracın müalicə müəssisəsinə köçürülməsi üçün təcridxana rəhbərliyinə müraciət etmişik. Ombudsman aparatı da həmin təkliflə Penitensiar Xidmətə müraciət edib, lakin hələlik nəticə yoxdur”, – vəkil vurğulayıb.

O, həbs müddətinin uzadılması ilə bağlı Apellyasiya Məhkəməsinə şikayət vermək niyyətindədir.

Ana səhifəXəbərlərSirac Kərimlinin həbs müddəti uzadılıb