ABŞ prezidenti Barak Obama deyib ki, terrorçular yenidən öz pozğunluqlarını nümayiş etdiriblər. BMT-nin baş katibi Ban Ki-moon isə olayı “vahimə aktı və eyni zamanda görülməmiş qorxaqlıq” adlandırıb
Pakistanda üç günlük matəm elan olunub. Dekabrın 16-ı Peşəvər şəhərində talibanın hərbi məktəbə hücumi nəticəsidə 132 məktəbli və 9 məktəb işçisi həlak olub. Hücumu həyata keçirən döyüşçülərdən altısı öldürülüb, ölənlərin əksəriyyəti kursantlardır. Onlarla yaralı var.
Terrora görə məsuliyyəti Pakistan talibançıları öz üzərinə götürüb. Bildiriblər ki, bu, ölkə ordusunun Şimali Vaziristanda talibana qarşı həyata keçirdiyi hərbi əməliyyatın qisasıdır. Baş nazir Nəvaz Şərif hücumu “vəhşilərin başlatdığı milli faciə” adlandırıb. Baş nazir parlamentdə olan bütün partiyaları dekabrın 17-də Peşəvərdə toplaşmağa və regionun təhlükəsizlik məsələlərinə dair konfrans keçirməyə dəvət edib.
Pakistan hökuməti ölkədə 3 gün, Türkiyə isə 1 gün matəm elan edib. Azərbaycan Xarici İşlər Nazirliyi məktəbdə törədilmiş və əsasən uşaqlar olmaqla, çoxlu sayda insanın ölümünə və yaralanmasına səbəb olan terror hücumlarını qəti şəkildə pisləyib. XİN-in bəyanatında deyilir: “Azərbaycan Respublikası həlak olanların ailələrinə və qardaş Pakistan xalqına dərin hüznlə baş sağlığı verir və yaralananların tezliklə sağalmasını arzu edir. Terrorizmdən əziyyət çəkən dövlət kimi, Azərbaycan terrorizmin bütün forma və təzahürlərini pisləyir və bir daha vurğulayır ki, heç bir terror əməlinə bəraət qazandırıla bilinməz”.
ABŞ prezidenti Barak Obama deyib ki, terrorçular yenidən öz pozğunluqlarını nümayiş etdiriblər. BMT-nin baş katibi Ban Ki-moon isə olayı “vahimə aktı və eyni zamanda görülməmiş qorxaqlıq” adlandırıb.
