Nazirlik açıqlamasında həmin hərbçilərin xidməti vəzifələrinin icrası zamanı ciddi qanun pozuntusuna yol verdiklərini deyir
Baş Prokuror yanında Korrupsiyaya Qarşı Mübarizə Baş İdarəsinin əməkdaşları Azərbaycan Müdafiə Nazirliyinin (MN) Baş Hərbi İnspeksiyasının yüksək rütbəli 3 hərbi qulluqçusunu həbs edib.Həbsləri Müdafiə Nazirliyinin (MN) mətbuat xidməti də təsdiqləyib: “Müdafiə Nazirliyi Baş Hərbi İnspeksiyasının əməkdaşları haqqında kütləvi informasiya vasitələrində yayılan xəbərlərlə bağlı bildiririk ki, inspeksiyanın əməkdaşları hərbi xidmət vəzifələrinin icrası zamanı yol verdikləri ciddi qanun pozuntularına görə Müdafiə Nazirliyi rəhbərliyinin göstərişi əsasında müvafiq araşdırma aparılıb və toplanmış materiallar qanuna müvafiq tədbir görülməsi üçün Azərbaycan Respublikasının Baş Prokurorluğuna göndərilib”.
Məlumatı yayan virtualaz.org saytı saxlanılan şəxslər barədə Səbail Rayon Məhkəməsinin qərarı ilə həbs-qətimkan tədbiri seçildiyini qeyd edib. “Həbs edilən şəxslər korrupsiyada ittiham olunur. Saxlanılan yüksək rütbəli şəxslərin adları virtualaz.org saytına məlumdur. Lakin çoxsaylı müraciətlərimizə baxmayaraq, Baş Prokurorluq onların adlarını hələ açıqlamır.
Bu həbslər barədə dövlət başçısı İlham Əliyev də məlumatlıdır və korrupsiya qalmaqalı barədəki istintaq prezidentin şəxsi göstərişi əsasında aparılır”,-deyə məlumatda bildirilir.
Sayt xatırladıb ki, Baş İnspeksiya İdarəsinin rəisi Qaradağ rayonunun sabiq hərbi komissarı, Milli Qəhrəman Fəxrəddin Cəbrayılovdur. O, bu vəzifəyə indiki müdafiə naziri Zakir Həsənovun dövründə təyin olunub. Lakin gözləntilərin əksinə olaraq ordu sistemindəki neqativ halların qarşısı nəinki alınmayıb, hətta daha geniş miqyas alıb.
