“Mehparə Səmədovanı uzun müddət gözlədib bir saat dəmir barmaqlıqlar arasından görüş verilib”
Azərbaycan İslam Partiyasının həbsdə yatan lideri Mövsüm Səmədova dekabrın 17-də həyat yoldaşı baş çəkib.
Qobustan həbsxanasında saxlanan Mövsüm Səmədov Qaradağ Rayon Məhkəməsinin 9 oktyabr qərarı ilə ora köçürülüb. 12 saylı Cəzaçəkmə Müəssisəsi rəisinin təqdimatına əsasən çıxarılan qərar məhbusun 2 il müddətinə qapalı həbsxana rejimində qalmasını nəzərdə tutur.
Azərbaycan İslam Partiyasının sədri Elçin Manafov dekabrın 18-də “Media forum” saytına deyib ki, məhbusun həyat yoldaşı Mehparə Səmədova çox çətinliklə görüş ala bilib: “Onu uzun müddət gözlədib bir saat dəmir barmaqlıqlar arasından görüş verilib. Xanımı Mövsüm Səmədovun səhhətinin yaxşı olmadığını, ürək ağrılarının şiddətli hal aldığını bildirir. Qapalı rejim səhhətinə daha kəskin təsir edib. Vəkilinə müraciət etmişik ki, Mövsümün müalicə müəssisəsinə köçürülməsi üçün zəruri addım atsın”.
Elçin Manafov deyib ki, məhbus lideri əvvəlki yerindən dustaqlar arasında olan nüfuzuna görə uzaqlaşdırıblar: “Ümumiyyətlə, son vaxtlar bir neçə məşhur islamçını Qobustana göndəriblər. Səbəb onlara saxlandıqları yerdə böyük hörmət bəslənməsi, arxalarında sözlərini eşidəcək çoxlu sayda məhbusun dayanması olub. Buna görə təcrid olunublar”.
Mövsüm Səmədov 2011-ci ilin yanvarından həbsdədir. O, hakimiyyəti zorla ələ keçirmə cəhdi və başqa ağır cinayətlərdə təqsirli bilinərək 12 il müddətinə azadlıqdan məhrum olunub.
