Vəkil: “Həbsxanaya qaytarıldıqdan dərhal sonra “karser”ə salınması qanunaziddir”
Azərbaycan İslam Partiyasının (AİP) sədri Mövsüm Səmədov 12 saylı cəzaçəkmə məntəqəsinə qaytarıldıqdan sonra “karser”ə salınıb. Bu barədə “Turan”-a vəkil Yalçın İmanov bildirib.
M.Səmədov 2011-ci ilin yanvarından həbsdədir. O, hakimiyyəti zorla ələ keçirmə cəhdində və başqa ağır cinayətlərdə ittiham olunaraq 12 il azadlıqdan məhrum edilib.
2014-cü il oktyabrın 9-da Qaradağ Rayon Məhkəməsi 12 saylı həbsxanadan 2 il müddətinə ciddi rejimli Qobustan həbsxanasına köçürülüb.
Vəkil Y.İmanovun sözlərinə görə, M.Səmədovun Qobustan həbsxanasında qalmasının müddəti noyabrın 28-də bitib. Növbəti gün onu əvvəllər cəza cəkdiyi 12 saylı cəzaçəkmə müəssisəsinı qaytarıblar. Həbsxanaya gəldikdən sonra M.Səmədovu 15 sutkalığa “karser”ə salıblar.
Vəkil M.Səmədovun həbsxanaya qayıtdıqdan sonra dərhal karserə salınmasını qanunazidd adlandırıb.
