Sakinlərin evlərini və həyətyanı sahələrini su basıb
Son iki gündə Lənkəran və Astara rayonlarında evləri su altında qalan 367 nəfər təhlükəsiz yerə təxliyə edilib.
Bu barədə məlumatı Fövqəladə Hallar Nazirliyinin (FHN) mətbuat xidməti yayıb.
Məlumatda bildirilir ki, son günlər yağan intensiv yağışlar nəticəsində Lənkəran və Astara rayonlarının bəzi ərazilərində fərdi yaşayış evləri və həyətyanı sahələr yağış suları ilə dolub. Eyni zamanda, Lənkəran və Astara çaylarında suyun səviyyəsi artıb. Yağıntıların törətdiyi fəsadların aradan qaldırılması üçün Fövqəladə Hallar Nazirliyinin Dövlət Yanğından Mühafizə Xidmətinin, Mülki müdafiə qoşunlarının, Kiçikhəcmli Gəmilərə Nəzarət və Sularda Xilasetmə Dövlət Xidmətinin və Cənub Regional Mərkəzinin canlı qüvvə və texnikası yağıntı suları ilə dolmuş ərazilərə xilasetmə işlərini davam etdirir.
“Report”un Cənub bürosunun məlumatına görə, daşqınlar nəticəsində 10-a yaxın körpü dağılıb.
Bundan başqa, Ələt-Astara avtomobil yolunun Velədi kəndi ərazisindən keçən hissəsində, Lənkərançayın üzərindəki avtomobil körpüsündə dörd yerdə çatlar əmələ gəlib.
Təbii fəlakətlə bağlı Lənkəran Şəhər İcra Hakimiyyətində fövqəladə yığıncaq keçirilib. Bildirilib ki, otyabrın 2-dən etibarən yağan aramsız leysan yağışlar nəticəsində Lənkərançay, Girdəni çayı, Viravul çayı, Boladı çayı, Qumbaşı çayı məcralarından çıxması səbəbindən ətraf əraziləri su basıb. Nəticədə şəhər ərazisi də daxil olmaqla Sütəmurdov, Girdəni, Şovu və Narbağı kəndi ərazilərində 34 evdən sakinlər təxliyə edilərək qohumlarının evinə köçürülüblər.
Əşlə kəndində dəmir-beton konstruksiyalı 1 avtomobil körpusü, Vilvan kəndində 1 piyada körpüsü, Boladi çayının üzərindəki 1 dəmir konstruksiyalı avtomobil körpüsü, Havzova kəndində 1 dəmir konstruksiyalı avtomobil körpüsü dağılıb. Girdəni kəndində Ulumçayın daşması nəticəsində bir məhəlləni magistral yolla birləşdirən körpü dağılıb. Şovu kəndində yeni tikilmiş ikimərtəbəli iki yaşayış evi və ona qədər evin daş hasarını sel suları dağıdıb. “Bəşəru” istirahət mərkəzi və Təngivan kənd ibtidai məktəbini sel suları basıb. Hətta Lerik rayonuna gedən 35 minlik elektrik xətti dirəyini də sel suları aşırıb.
Eyni zamanda dağ kəndlərindən olan Gəgiran, Tuado, Bəliton kəndlərində torpaq sürüşmələri baş verib. Yollarda nəqliyyatın hərəkəti məhdudlaşıb. Tuado kəndində dəmir-beton konstruksiyalı körpü dağılıb. Gəgiran kəndində bir ev qəzalı vəziyətə düşüb.
Günəhir-Türkəncil yolunun bir neçə yerində də sel suları avtomobil yolunu yuyub. Lənkəran-Lerik avtomobil yolunun 18-ci km-də torpaq sürüşməsi baş verib.
Lənkəran çayının və magistral kollektorun məcradan çıxması nəticəsində şəhər ərazisində 150-dən çox, kəndlərdə isə 400-dən artıq evə və ya təsərrüfata ziyan dəyib, lil kütləsi evlərə dolub.
Lənkərandakı yarımstansiyada baş verən qəza səbəbindən rayon ərazisinin bir çox ərazisində elektrik enerjisinin verilişi dayandırılıb. Bu istiqamətdə təmir-bərpa işləri aparılsa da, hələlik qəzaları tamamilə aradan qaldırmaq mümkün olmayıb.
Hazırda yağış dayanıb, evlərdən sular çəkilir.
Sürüşmə nəticəsində bağlanan Lənkəran-Lerik yolunda da avtomobillərin hərəkəti qismət bərpa edilib.
