“Toplum TV işi” çərçivəsində həbs olunmuş III Respublika Platformasının spikeri Akif Qurbanov və Qurusu Heyət üzvü Ruslan İzzətli Milli Mətbuat Günü münasibətilə ictimaiyyətə müraciət edib. Həmin müraciətləri təqdim edirik:
Akif Qurbanov: “Zərdabinin davamçıları həqiqəti yazdığına görə həbsə atılmış Aynur Elgünəş, Ələsgər Məmmədli, Sevinc Vaqifqızı, Şəmşad Ağadır…”
“ABŞ Prezidenti olmuş Abraham Linkolnun məşhur fikri var: “Demokratiya – bütün insanları bir müddət aldada bilərsiniz, bir qisim insanı daima aldada bilərsiniz, amma bütün insanları daima aldada bilməzsiniz – prinsipi üzərində qurulur”. Bizimki tipli siyasi rejimlər bunu yaxşı bildiyi üçün “demokratiya”nın formalaşmasına imkan vermir.
Avtokratiya – tək adamın hakimiyyətini quraraq hər şeyi tək adamın – Əliyevin üzərinə kökləmək hər şeyi ondan asılı edir. Bir sözlə, xalqın taleyi tək adamın taleyindən asılı olur. Necə ki, Əliyev açıq deyir: “Nəyi, nə zaman, necə etməyi mən çox yaxşı bilirəm.”
O, heç kimin məsləhətinə, ağlına ehtiyac duymur, bütün qərarları da yalnız özünün verdiyini nümayiş etdirir. Həmçinin, yaxşı başa düşür ki, bütün insanları daima aldada bilmək üçün ictimai rəyi formalaşdırmaqda əsas rol oynayan media üzərində nəzarəti ələ almalıdır. Bununla, vətəndaşların həqiqətin fərqində olmasını əngəlləyir.
Bəs həqiqət nədir?
Həqiqət inanca deyil, yalnız müşahidə və dəlillərə (faktlara) söykənən dəyərdir. Tək adam rejimləri isə medianı nəzarətində saxlamaqla uğursuzluqlarını başqalarının üzərinə ataraq diqqəti xəyali, gerçəklərdən uzaq istiqamətə aparır. Yəni, həqiqəti gizlədir, yayındırır, danır və s.
Bəs Həsən bəy Zərdabinin və həmin dövrün mütəfəkkirlərinin əsas qayəsi nə idi?
Maarifçilik! Yəni, dövrünün həm miflərindən – yalançı hekayələrindən, həm mövhumatçılıqdan, həm də cahillikdən xilasına çalışmaq idi. “Əkinçi”nin əsas hədəfi də məhz maarifçiliyi yaymaq, o dövrün geniş kütlələrini həqiqətlərlə tanış edərək, məlumatlandıraraq ayıltmaq, aydınlandırmaq idi. Müasir dövrün anlayışları ilə təsvir etsək, toplumu agahlandırmaq, media savadlılığını artırmaq, dezinformasiya, faktlarla manipulyasiya və propaqanda ilə mübarizə aparmaq idi.
Hazırda Zərdabinin adına və irsinə yiyələnmək istəyən tayfa dövlətin güc aparatına, inzibati və maliyyə resursuna söykənərək 150 illik yubiley adı ilə müxtəlif təltiflər, mükafatlar, tədbirlər və s. təşkil etməklə nə edirlər? Maarifçilikləmi məşğuldurlar? Maarifçilik həqiqəti dana, yalana söykənə bilərmi? Zərdabinin davamçısı həqiqəti görə-görə özünü və ya status-kvonu (mövcud vəziyyəti) qorumaq üçün səssiz qala və ya hər cür propaqanda üçün alətə çevrilə bilərmi? Zərdabinin və maarifçi mütəfəkkirlərin yolunu belələri davam etdirə bilərmi?
Xalqımız yaxşı bilməlidir ki, Zərdabi və “Əkinçi”nin davamçıları da, əsl maarifçilər də məhz maarifçiliyinə – həqiqəti yazdığına, söylədiyinə görə həbsə atılmış Aynur Elgünəşdir, Ələsgər Məmmədlidir, Sevinc Vaqifqızıdır, Şəmşad Ağadır və digər həmkarlarıdır, düşdüyü yerindən aılı olmayaraq həqiqəti söyləməyə davam edən, dəyərləri uğrunda yolundan dönməyən siyasi məhbuslardır. Həmçinin, ev dustağına çevrilən, ölkədə peşə fəaliyyətini icra edə bilməyən, hər cür məhrumiyyətlərə məruz qalan jurnalistlər, ictimai fəallar və siyasətçilər, o cümlədən mövqeyinə görə vətənindən didərgin salınan dəyərli insanlarımızdır.
19 iyul 2025-ci il tarixində Xankəndidə çıxış edən tək-adam rejiminin sahibi İlham Əliyev medianın dövlət marağını gözəl qoruduğunu, müdafiədə deyil, əsasən, hücumda oynadığını qeyd etməklə yuxarıda dediklərimi bir daha təsdiqlədi. Əminəm ki, ölkəmizin agah insanları Əliyevin söylədiyi “dövlət marağı” ifadəsinin tək-adam rejiminin qorunmasına mənasına gəldiyini çox yaxşı bilir. Media deyəndə də propaqanda maşını funksiyasını icra edənləri nəzərdə tutur. Onun anlayışına görə, kim tək adama xidmət edirsə, o, ən böyük vətənpərvərdir, dövlətçidir və s.
Belə epitetlərlə ictimai rəyə sırınan, əslində isə həqiqəti gizlədən, yayındıran, danan propaqanda alətindən başqa bir şey deyil. Unutmayaq ki, bütün propaqandaçılar Hitlerin məşhur təbliğat naziri olmuş Cozef Gobelsin metodundan istifadə edir. Onun məşhur sözü belə idi: “Bir dəfə söylənən yalan, yalan olaraq qalar, amma min dəfə söylənən yalan həqiqətə çevrilir.”
Sözün gerçək mənasında baxsaq, nə “Əkinçi”, nə də müasir, həqiqi medianın işi heç bir marağı birbaşa qorumaq deyil. “Əkinçi”nin də, müasir medianın da əsas işi insanları həqiqətlər barədə məlumatlandırmaqdır.
Həqiqəti bilən agah, məlumatlı insanlar cəmiyyətdə nə qədər çox olacaqsa, orada nə tək-adam rejimi qala bilər, nə də daima aldadılan insanlar. Nəticədə, idarə olunan (tək adamın idarə etdiyi) cəmiyyətdən özünü idarə edən cəmiyyətə (III Respublika qurulanda) çevriləcəyik.
III Respublika Platforması olaraq bizim əsas missiyamız da budur. Bununla da, insan ləyaqətinin üstün tutulduğu bir Azərbaycana – III Respublikaya nail olacağıq. Məhz III Respublika dövründə əsl milli maraq – insanın, millətin və dövlətin marağı qorunacaq, indiki kimi tək adamın yox.
Ona görə də, yaşasın bizi o günlərə aparacaq əsl maarifçilər – “Əkinçi”nin xələfləri, cəmiyyətə həqiqətləri çatdıran, dəyərləri uğrunda məhrumiyyətlərə sinə gərən dəyərli insanlar! Şübhəsizdir ki, məhz onların sayəsində, indiki yalançı, riyakar mühitdən, mövcud qaranlıqdan aydınlığa mütləq çıxacağıq! Sizi təbrik edir, yaxşı ki varsınız deyirəm!
Ruslan İzzətli: “Baş verən haqsızlığın fonunda özünə jurnalist deyənlər təəssüf ki, şəxsi çıxarlarını üstün tutaraq susurlar”
Qurucu liderimiz Məmməd Əmin Rəsulzadə deyirdi ki, millətə hər cür fitnə və fəsadın mənbəyini,onun hansı tərəfdən gəldiyini göstər. Əminik ki, o zaman millət nə edəcəyini bilər. Fitnə və fəsadın, onun hansı tərəfdən gəldiyini millətə göstərən siyasətçilər, jurnalistlər bugün həbsxana hücrələrinə məhkum ediliblər.
Korrupsiya millətimizi məhv edir deyirdim. Əyani sübutum yağış suları nəticəsində körpünün altında tuneldə boğulan vətəndaşın faciəsi, yol gedərkən yolun çökməsi nəticəsində kanalizasiyaya düşüb boğulan vətəndaşın faciəsi… Bunu hər biriniz gördünüz.
Xarici siyasətimizi tənqid edirdim. Strateji müttəfiqimiz kimi bizə təqdim etdikləri Rusiyanın son bir ildə ölkəmizə,millətimizə etdiklərini hər birimiz izləyirik.
Unutmayın ölkəmizdəki problemlərin hər biri siyasidir. Çıxış yolu da siyasi iştirakçılıqdan keçir. Baş verən haqsızlığın, ədalətsizliyin fonunda özünə ziyalı, jurnalist, siyasətçi deyənlər təəssüf ki, şəxsi çıxarlarını millətin mənafeyindən üstün tutaraq susurlar.
Hüqo “Ölüm məhbusunun son günü” əsərində yazırdı: ” Ürəyimin dərinliyində bu adamlara yazığın gəlirdi, onlar güləndə mən ağlamaq istəyirdim”.
Hər zaman yazdığım, dediyim fikirləri bir daha təkrar edirəm. Qaranlıqdan aydınlığa çıxış sənin addımından asılıdır. Hardansa ümid gözləmə!
Sonda fikrimi ABŞ-nin keçmiş prezidenti Barak Obamanın 2015-ci ilin iyul ayında etdiyi çxışındakı sözlərlə bitirirəm. “Bəzən liderlərin “mən bu ölkəni bir arada tuta biləcək tək kişiyəm” dediklərini eşidəcəksiniz. O zaman bilin ki, o lider ölkənin inkişafı mövzusunda gerçəkdən uğursuzdur”.
