“Hətta bəzən gətirilən sovqatı belə güc-bəla ilə qəbul edirlər”
Avqustun 27-də tanınmış ilahiyyatçı Hacı Tale Bağırzadə saxlandığı 12 saylı cəzaəkmə müəssisəsində ona qarşı olunan haqsızlıqlarla bağlı ölkə ictimaiyyətinə müraciət edib.
Müraciətdə bildirilir ki, Azərbaycan həbsxanalarında məhbuslara qarşı münasibət, Penitensiar Xidmət qulluqçularının onlarla davranış tərzi hamıya bəllidir. Onların gözündə məhbus, sanki Kəlbəcərdə ələ keçirilmiş erməni diversantıdır: “Fərz edək ki, hansısa məhbus həqiqətən də cinayət əməli törədib və öz cəzasını alıb. Amma bu, heç bir halda onun öz insani və qanuni haqlarından məhrum edilməsinə səbəb ola bilməz. Təbii ki, bu sırada siyasi və vicdan məhbuslarına qarşı münasibət, onların hüquqlarının pozulması, onlara qarşı kobud münasibət, fiziki və psixoloji basqılar digərlərininkindən fərqlənir. Onların həbsinin motivi kimi, həbsxanada onlara qarşı davam edən haqsızlıqlar da siyasi xarkter daşıyır”.
Hacı Tale Bağırzadə özünün də həbsxananın yazılmamış “qanun”dan kənarda qalmadığını bildirir: “İstər saxlanılarkən, istərsə də sonrakı mərhələlərdə şəxsimə qarşı edilən haqsızlıqlar, mənə qarşı edilən fiziki və mənəvi zorakılıqlar zaman-zaman mətbuatda işıqlandırılıb. Amma bu “münasibət” hələ də davam etməkdədir. Hazırda saxlanıldığım 12 saylı cəzaçəkmə müəssisəsinin rəhbərliyi tərəfindən hüquqlarım məhdudlaşdırılır”.
İlahiyyatçı müvafiq qanunvericiliyin tələblərinə baxmayaraq, yaxınlarıyla görüşə icazə verilmədiyini yazır: “Hətta bəzən gətirilən sovqatı belə güc-bəla ilə qəbul edirlər. Müəssisənin rəhbəri Rauf Məmmədov bunu Prezident Adminstrasiyası, MTN və Penitensiar Xidmət rəhbərliyi tərəfindən verilən sifarişlə əlaqəli olduğunu bildirir və beləcə məsuliyyəti öz üzərindən atmaq istəyir. Ola da bilsin ki, həqiqətən yuxarılardan sifariş verilib. Ancaq Kürdəxanı təcridxanasında olduğum zaman yaxınlarımla görüşməyimdə, sovqatın çatdırılmasında heç bir maneə yox idi. Onda belə çıxır ki, Azər Seyidov öz karyerasını riskə ataraq yuxarıların tapşırığına məhəl qoymurdu, yaxud da ki, Rauf Məmmədov hakimiyyətə yarınmaq üçün dəridən-qabıqdan çıxır?! İstənilən halda, mən, şərlənərək həbs olunan birisi kimi və haradan qaynaqlandığından asılı olmayaraq bütün bu qanunsuzluqların, özbaşınalıqların dərhal dayandırılmasını tələb edirəm”.
