Gürcüstanın 6 QHT-si bildirib ki, avqustun 11-də Korrupsiyaya Qarşı Mübarizə Bürosundan Xarici Agentlərin Qeydiyyatı haqqında Qanunun pozulduğu və həmçinin “xarici qüvvələrin maraqlarını təmsil edən şəxslərin” reyestrində niyə qeydiyyata alınmadıqları ilə bağlı izahat tələb edən növbəti məktub alıblar.
QHT nümayəndələri onların müvafiq reyestrdə qeydiyyatdan keçmələrinin tələb olunmadığını təsdiq edən hüquqi sənədləri Korrupsiyaya Qarşı Mübarizə Bürosuna göndərəcəklərini bildiriblər.
“Biz öz nizamnaməmiz əsasında fəaliyyət göstərən müstəqil Gürcüstan qeyri-hökumət təşkilatlarıyıq. Missiyamız qadınların, uşaqların, işçilərin, əlillərin, qaçqınların və bütün məzlum insanların hüquqlarını qorumaqdır. Bizim missiyamız seçkiləri izləmək, korrupsiya və dezinformasiyanı ifşa etmək, demokratiyanı qorumaq və gürcü xalqına kömək etməkdir. Biz yalnız və yalnız Gürcüstan xalqının maraqlarına xidmət edirik”.
QHT-lər birgə bəyanatda bildiriblər ki, bununla bağlı İvanişvili-Kupraşvili bürosuna müraciət edəcəklər.
“Bu qanunun guya surəti olduğu Amerika FARA standartına görə bizdən bu reyestrdə qeydiyyatdan keçməyimiz tələb olunmur. Bu məsələ ilə bağlı İvanişvili-Kupraşvili bürosuna da müvafiq hüquqi sənəd göndərəcəyik”.
“Putin Rusiyası üslubunda müstəqil QHT-lərin və azad medianın təqib edilməsi demokratiyanı məhv etmək məqsədi daşıyır. Amma biz işləməyə davam edirik və gürcü xalqını dəstəksiz qoymayacağıq. Biz Gürcüstan gürcü xalqının layiq olduğu azad, demokratik Aİ üzvü olana qədər mübarizə aparacağıq”,- bəyanatda belə deyilir.
Bəyanatda QHT-lər bildirir ki, onlar Rusiya qanunları ilə yaşamaq niyyətində deyillər və gürcü xalqının hüquqları uğrunda mübarizəni davam etdirəcəklər.
Bəyanatı Sapari; Vətəndaş Cəmiyyəti Fondu; Transparency International – Gürcüstan; Media İnkişafı Fondu; Sosial Ədalət Mərkəzi; Beynəlxalq Ədalətli Seçkilər və Demokratiya Cəmiyyəti (ISFED) imzalayıb.
