“Qətli həyata keçirən Natalya Vovk Ukrayna vətəndaşıdır”
Rusiya Federal Təhlükəsizlik Xidməti (FTX) politoloq Aleksandr Duqinin qızı Daria Duqinanın qətlində Ukrayna xüsusi xidmət orqanlarını günahlandırıb.
Bu barədə FTX avqustun 22-də yaydığı açıqlamada bildirib.
Federal Təhlükəsizlik Xidmətinin məlumatında vurğulanıb ki, qətli həyata keçirən Natalya Vovk Ukrayna vətəndaşıdır: “1979-cu il təvəllüdlü Natalya Vovk iyulun 23-də qızı ilə birgə Rusiyaya gəlib və Duqinanın yaşadığı binada mənzil kirayələyiblər”.
“Avqustun 20-də Natalya Vovk Daria Duqinanın iştirak etdiyi festivala qatılıb. Qətli törədən günün səhəri, avqustun 21-də qızı ilə Pskov vilayətindən Estoniyaya keçib”, – deyə FTX bildirib.
Məlumatda qeyd edilib ki, Natalya Vovkun Rusiyaya daxil olarkən “Donetsk Xalq Respublikası”nın E982ХН DPR qeydiyyat nömrəli avtomobili olub:
“Moskvada isə Qazaxıstanın nömrələri istifadə olunub – 172AJD02. Qətldən sonra ifaçı “AH7771IP” Ukrayna nömrəsi ilə ölkəni tərk edib”.
Avqustun 20-də rusiyalı politoloq Aleksandr Duqinin qızı Daria Duqina avtomobilinin partlaması zamanı həlak olub.
Hadisənin Daria Duqinanın “Tradition” festivalından qayıdarkən baş verdiyi bildirilir.
Avqustun 21-də isə Daria Duqinanın qətlini “Milli Respublika Ordusu” öz üzərinə götürdüyü barədə açıqlama yayıb.
