Hadisə nəticəsində 4 nəfər yaralanıb
Qazax rayonunun Qızılhacılı kəndində mina partlayıb. Kənd Azərbaycan-Ermənistan sərhədinin delimitasiyası ilə bağlı bu ilin aprelin 19-da tərəflər arasındakı razılaşmaya əsasən Azərbaycana qaytarılıb.
Hadisə avqustun 2-də baş verib. Baş Prokurorluq, Dövlət Sərhəd Xidməti və Minatəmizləmə Agentliyinin (ANAMA) birgə məlumatında deyilir ki, hadisə nəticəsində Dövlət Sərhəd Xidmətinin hərbi qulluqçusu, gizir Xəyal Əhədli və Minatəmizləmə Agentliyinin əməkdaşı Afiq Mehdizadə ayaq nahiyəsindən xəsarət alıblar.
Ərazidə minatəmizləmə işlərilə məşğul olan ANAMA-nın digər əməkdaşları Elçin Ələkbərov və Yavər Mirzəyev isə qəlpə yaraları alıb.
“Xəsarət alan şəxslər ilkin tibbi yardım göstərilməklə, dərhal xəstəxanaya çatdırılıblar. Həyatları üçün təhlükə yoxdur”, – rəsmi açıqlamada bildirilir.
Faktla bağlı prokurorluqda araşdırma aparılır.
