Zorakılığa məruz qaldığı deyilən media nümayəndələri ilə bağlı hökumətə suallar ünvanlanıb
Avropa Məhkəməsi 2008-2015-ci illərdə müxtəlif vaxtlarda zorakılığa məruz qalmış jurnalistlər – Zamin Hacı, Əfqan Muxtarlı, Həkimeldostu Mehdiyev, İlqar Nəsibov, Ramid İbrahimov, Ehtimad Budaqov, İdrak Abbasov, Tapdıq Fərhadoğlunun Azərbaycana qarşı şikayətləri üzrə kommunikasiya başlayıb.
Bu barədə məlumatı avqustun 1-də vəkil Fariz Namazlı öz “Facebook” səhifəsində yayıb. Onun sözlərinə görə, məhkəmə Konvensiyanın 3-cü (işgəncəyə məruz qalmamaq hüququ) və 10 (ifadə azadlığı hüququ) maddələrinin pozuntusu ilə bağlı hökumətə suallar ünvanlayıb. İlk 7 ərizəçinin hüquqlarını Rəşid Hacılı, Tapdıq Fərhadoğlunun hüquqlarınl isə Samirə Ağayeva qoruyur.
“Qeyd edim ki, Zamin Hacı 2008-ci ildə Akif Nağını əkə adlandırdığına görə onun və daha 3 nəfər şəxs tərəfindən döyülmüşdü, CM-nin 163-cü maddəsi ilə cinayət işi aşılsa da, sonradan həmin 3 nəfərin tapılmaması əsası ilə icraat dayandırıldı və hər hansı istintaq hərəkətləri aparılmadı.
Əfqan Muxtarlı 2009-cu ildə Bakıda İsrail səfirliyinin yanında Yasamal rayon Pİ-nin əməkdaşları tərəfindən döyülmüşdü, onun xəsarət alması ilə bağlı sənədlər olsa da, cinayət işinin başlanması rədd edildi.
Həkimeldostu Mehdiyev 2009-cu ildə Naxçıvanda Ümid Partiyasının keçirdiyi aksiya zamanı tanımadığı şəxs tərəfindən döyülmüşdü, lakin hüquq-mühafizə orqanları tərəfindən bu məsələ araşdırılmadı.
İlqar Nəsibov 2009-cu ildə Naxçıvan Dövlət Universitetinin tələbələri tərəfindən döyülmüşdü, lakin hər hansı cinayət işi açılmadı.
Ramid İbrahimov 2011-ci ildə Prezident Administrasiyasının qarşısında jurnalist vəzifələrini icra edən zaman polis əməkdaşları tərəfindən döyülüb, yenə də cinayət işi başlanmayıb.
Etimad Budaqov 2012-ci ildə Şəmsi Bədəlbəyli küçəsində evlərin dağıdılması zamanı polis zorakılığına məruz qalmışdı, lakin cinayət işi başlanmadı.
İdrak Abbasov 2012-ci ildə Sulutəpədə ARDNŞ-in əməkdaşları tərəfindən vəhşicəsinə döyülüb, döyülməsi ilə bağlı effektiv araşdırma aparılmayıb.
Tapdıq Fərhadoğlu (Quliyev) 2014-cü ildə BDU-nun tələbələrinin aksiyasını işıqlandıran zaman döyülüb, bu iş də araşdırılmayıb” – deyə vəkil qeyd edib.
