Müşahidəçilər Azərbaycanda vətəndaş cəmiyyəti və KİV nümayəndələri ilə görüşəcəklər
Sentyabrın 26-də Azərbaycan Konstitusiyasına dəyişikliklərlə bağlı keçiriləcək referendumun müşahidəsi üçün Avropa Şurası Parlament Assambleyası (AŞPA) 7 nəfərlik heyət göndərəcək.
AŞPA-nın mətbuat xidmətindən “Report”a deyilib ki, müşahidəçilər Azərbaycan hökumətinin dəvəti ilə göndərilir.
Nümayəndə heyətinə Aleksandr Nikoloski (Makedoniya) başçılıq edəcək.
Ümumi tərkib isə belədir:
Andrea Riqoni (İtaliya);
Yanaki Stoylov (Bolqarıstan);
Antonio Qutyerres (İspaniya);
Dominik Tarjinski (Polşa);
Ştefan Şennax (Avstriya), Azərbaycan üzrə Monitorinq Komitəsinin həmməruzəçisi;
Sezar Florin Preda (Rumıniya), Azərbaycan üzrə Monitorinq Komitəsinin həmməruzəçisi.
Nümayəndə heyəti səfər zamanı İlham Əliyev, Milli Məclisin sədri Oqtay Əsədov, Mərkəzi Seçki Komissiyasının sədri Məzahir Pənahov, Azərbaycanın AŞPA-dakı nümayəndə heyətinin üzvləri, eləcə də vətəndaş cəmiyyəti və KİV nümayəndələri ilə görüşəcəklər. Referendum günü nümayəndə heyətinin üzvləri seçki məntəqələrinə baş çəkəcəklər.
AŞPA nümayəndə heyətinin rəhbəri sentyabrın 27-də Bakıda keçirəcəyi mətbuat konfransında referendumun monitorinqinin nəticələrinə dair öz fikirlərini açıqlayacaq.
