Bakı və Yerevandan atəşkəsin pozulması ilə bağlı fərqli mövqe

Azərbaycan-Ermənistan, Andrii Anna photographers/Shutterstock


Azərbaycan atəşkəsin pozulduğunu deyir, Ermənistan təkzib edir

Azərbaycan Müdafiə Nazirliyi aprelin 13-də Ermənistan ordusunun Tovuz rayonu istiqamətində atəşkəsi pozduğu barədə məlumat yayıb.

Nazirlik bildirir ki, saat 08:30-da Ermənistan silahlı qüvvələrinin bölmələri Tovuzqala rayonunun Çinarlı yaşayış məntəqəsində yerləşən mövqelərindən Tovuz rayonunun Koxanəbi yaşayış məntəqəsi atəşə tutub:

“Bölmələrimiz tərəfindən qeyd olunan istiqamətdə adekvat cavab tədbirləri görülüb”.

Ancaq Ermənistan Müdafiə Nazirliyi məlumatın doğru olmadığını bildirir:

“Ermənistan silahlı qüvvələrinin Azərbaycan mövqelərini atəşə tutması barədə Azərbaycan Müdafiə Nazirliyinin məlumatı reallığa uyğun gəlmir”.

Münaqişənin qısa tarixçəsi

2020-ci ilin sentyabrında Azərbaycan və Ermənistan silahlı qüvvələri arasında 44 günlük İkinci Qarabağ müharibəsi baş verib.

Azərbaycan Qarabağın bir hissəsinə və ətraf 7 rayona nəzarəti bərpa edib.

2023-cü ilin sentyabrın 19-da Azərbaycan Qarabağda lokal hərbi əməliyyat keçirib.

Sentyabrın 28-də isə separatçı “Dağlıq Qarabağın (Artsax) Prezidenti” Samvel Şahramanyan “respublika”nın buraxılması barədə fərman imzalayıb.

O, fərmanı 19 sentyabr 2023-cü ildən sonra yaranmış vəziyyətlə əlaqələndirib.

2023-cü il oktyabrın 15-də isə Prezident İlham Əliyev Xankəndidəki çıxışında Azərbaycanın öz suverenliyini tam bərpa etdiyini, Qarabağ probleminin bitdiyini, münaqişənin sona çatdığını deyib.

Azərbaycan və Ermənistan arasında hələ də sülh müqaviləsi imzalanmayıb.

Ana səhifə ▸ Siyasət ▸ Bakı və Yerevandan atəşkəsin pozulması ilə bağlı fərqli mövqe