Məzarlıqda azı 8 min nəfərin qalıqlarının olduğu bildirilir
Polşanın Milli Yaddaş İnstitutu İkinci Dünya müharibəsinə aid iki kütləvi məzarlıq aşkar edib.
Təşkilatın rəhbəri Karol Navrotski bildirib ki, qalıqlar Varşavanın şimalında, “Dzialdovo” kimi tanınan “Soldau” konsentrasiya (insanların etnik, siyasi və dini mənsubiyyətinə görə tutulduqları müəssisə) düşərgəsinin yaxınlığındakı meşədə tapılıb.
Kütləvi məzarlıqlarda ən azı səkkiz min nəfərin qalıqlarının olduğu bildirilib.
Mütəxəssislər bu qənaətə ümumilikdə 17 tondan çox külün tapılması faktını əsas gətiriblər.
Cəsədlərin soyqırımın izlərini silmək üçün nasist əməliyyatında qəbirlərdən çıxarılaraq yandırılıb və yenidən basdırıldığı təxmin edilir.
“Dzialdovo” kimi tanınan “Soldau” düşərgəsi 1939-cu ildə tikilib.
Düşərgədə 30 minə yaxın insanın öldürüldüyü təxmin edilir.
İkinci Dünya müharibəsi zamanı 6 milyon polyak, o cümlədən 3 milyon yəhudinin öldürüldüyü deyilir.
