Kənd sakinlərinin şikayətinə Cəlilabad rayon İcra Hakimiyyətindən, hələlik, münasibət almaq mümkün olmayıb
“Bakı-Astara magistral yolu açılsa da Alar kəndində əhalinin vəziyyəti pisdir. Evləri su basıb, 3-4 ev isə dağılıb”, – AzadlıqRadiosuna kənd sakini Əlişir Məmmədov söyləyib.
Bakı-Astara magistral yolunda nəqliyyatın hərəkəti oktyabrın 27-də dayanmışdı.
“35-ə qədər ev suyun içindədir”
Ə.Məmmədovun bildirməsinə görə, oktyabrın 27-si axşamdan Gülməmmədli kəndi istiqamətindən Alar kəndinə sel axını başlayıb. Ancaq oktyabrın 28-i səhərə yaxın saat 4-də bunun qarşısı nisbətən alınıb: “Magistral yolu yardılar ki, sel çay yatağı ilə getsin, kəndə ziyan vurmasın. Amma buna qədər sel öz işini gördü. Hazırda mənim bildiyim 35-ə qədər ev suyun içindədir. İnsanlar evlərinə daxil ola bilmirlər”.
Ə.Məmmədovun deməsinə görə, evlərdə suyun hündürlüyü 15-70 sm arasındadır.
Kənd sakini Şahlar Əhədov isə deyir ki, bütün gecəni maşında keçiriblər: “Yox, bu təkcə yağış məsələsi deyil. Sovet vaxtı Gülməmmədli, Cəfərxanlı tərəfdə su anbarları var idi. Sonra bu su anbarlarını balıq yetişdirmə göllərinə döndərdilər. Selə əsas səbəb məhz həmin Gülməmmədli kəndindəki gölün dağılmasıdır”.
Təhlükə sovuşmayıb
Ş.Əhədov deyir ki, təhlükə bitməyib. Başqa bir təhlükə də başlarının üstünü alıb. İndi isə Cəfərxanlı kəndindəki gölün dağılacağından narahatdırlar: “O göl Gülməmmədli kəndindəki göldən daha böyükdür. Onun da partlaması ehtimalı çox böyükdür. Əgər o partlasa, təkcə Alar deyil, digər kəndlər də bundan olduqca ciddi ziyan çəkəcək. Təhlükənin də aradan qaldırılması üçün hər hansı tədbir görülmür”.
Ş.Əhədov deyir ki, su içində olan evlərin sayı 35 yox, 100-dən çoxdur.
“Gecəni harda keçirdiyimizlə maraqlanan yoxdur”
O, rayon rəhbərliyinin əhalinin vəziyyəti ilə maraqlanmadığından da gileylənir: “Hələ indiyə kimi kənd sakinlərinin durumu ilə maraqlanan yoxdur. Maraqlanmırlar ki, gecəni harada və necə keçirmişik? Bunlara dəyən ziyanın həcmi nədir? Durumu yüngülləşdirmək üçün nə etmək istəyirlər? Hələ də biz kənd sakinlərinə aydın deyil. Amma bunu da deyim ki, rayon hakimiyyətinin bizə hər hansı köməyi olacağına heç ümidim də yoxdur”.
Kənd sakinlərinin şikayətinə Cəlilabad rayon İcra Hakimiyyətindən, hələlik, münasibət almaq mümkün olmayıb.
