Sülhəddin Əkbər Milli Şuradan getdi

Azad Demokratlar Partiyasının sədri ümid edir ki, qurultaydan sonra Müsavat Partiyasıyla normal münasibətlər qurulacaq

İyulun 6-da Azad Demokratlar Partiyasının (ADP) təsis qurultayı keçirilib. Tədbirdə partiyanın sədri Sülhəddin Əkbər seçilib. ADP-nin təsis edilməsi üzrə Təşkilat Komitəsi 2013-cü ilin dekabrında Açıq Cəmiyyət Partiyasının bazasında yaradılıb. O zaman partiyanın lideri ABŞ-da mühacirətdə olan parlamentin keçmiş spikeri Rəsul Quliyev, sədr isə Sülhəddin Əkbər idi. Ancaq 2013-cü ilin prezident seçkilərindən sonra Rəsul Quliyevlə Sülhəddin Əkbərin yolları ayrıldı. ADP sədri Sülhəddin Əkbərlə söhbətimizdə yeni partiyanın gələcək fəaliyyət və prinsiplərinə toxunduq.

-         Sülhəddin bəy,  Azərbaycanda dinçiliyin, təriqətlərarası mübarizənin və bunların fonunda Qərbə antipatiyanın gücləndiyi zamanda liberal dəyərlərə əsaslanan partiya yaratmağınız hansı zərurətdən doğdu?

-         İnsan hansı dəyərləri və prinsipləri qəbul edirsə, cəmiyyətdə müxtəlif  tendensiyaların güclənməsindən asılı olmayaraq o dəyər və prinsiplərə sadiq olmalıdır.  İkinci, Azərbaycan və başqa cəmiyyətlərdə dinə meyl o zaman artır ki, siyasi-ideoloji boşluq yaranır, siyasi həyatda demokratik şərait olmadığından insanlar siyasi tələbatlarını ödəyə bilmədiklərindən böyük əksəriyyət dinə meyllənir. Üçüncü, dinə meyl sosial-iqtisadi problemlərin ağır olduğu cəmiyyətlərdə daha da artır. Sadaladığım hər üç məqam Azad Demokratlar Partiyasını (ADP) yaratmağa sövq etdi. Azərbaycan cəmiyyətində belə bir partiyaya ehtiyac var, çünki ölkə demokratikləşməlidir, Avropaya inteqrasiya olmalıdır. Azərbaycanın demokratikləşməsi üçün də orta təbəqənin formalaşmasına ehtiyac var. Bunun üçün orta təbəqənin maraqlarını ifadə edən siyasi qüvvəyə ehtiyac yaranıb. Bu mənada liberal partiyanın yaranması həm daxili ictimai-siyasi ehtiyacdan doğur, həm də qlobal və regional siyasi çağırışlara cavab verir.

-         Azərbaycan cəmiyyətində hakimiyyəti və müxalifəti dəstəkləyən sosial bazayla bərabər passiv çoxluq da var. Azad Demokratlar Partiyasında (ADP) hansılar çoxluq təşkil edir, keçmiş müsavatçılar, yoxsa siyasiləşməyənlər?

-         Partiyamızda müxtəlif siyasi keçmişi olan insanlar var. YAP-ın, Müsavatın,  AXCP-nin, ADP-nin və heç bir siyasi partiyada olmayan insanlar  Azad Demokratlar Partiyasına üzv olublar.

-         Hansı çoxluq təşkil edir?

-         Dəqiq deyə bilməyəcəm, amma hər halda Milli Azadlıq Hərəkatında iştirak edənlər çoxluq təşkil edir.

-         Sülhəddin bəy, mövcud siyasi situasiyanın yaranmasında hansısa partiyanı, yaxud  hərəkatın, məsələn, Milli Şuranın məsuliyyət daşıdığını düşünürsünüzmü?

-         Bu, bir qədər demoqoqik sual olur. Çünki indiki vəziyyətin yaranmasında hər bir Azərbaycan vətəndaşının günahı var. Təbii ki, birbaşa siyasətlə məşğul olduqları üçün siyasi qüvvələrin günahı daha çoxdur. Bölgü aparılsa, günahı hakimiyyətdə görməliyik, səbəb də odur ki, indiki vəziyyət hakimiyyətin apardığı siyasətin nəticəsində yaranıb. Eyni zamanda, siyasi müxalifət də vəziyyəti dəyişə bilmədiyinə görə siyasi-mənəvi məsuliyyət daşıyır.

-         Partiyanız Milli Şurada fəaliyyət göstərəcək, yoxsa...?

-         Partiyamız başlıca fəaliyyət istiqamətlərini qəbul edib, bunlardan biri də siyasi münasibətlərin qurulmasıdır. Siyasi münasibətlərin qurulmasında prinsipləri qəbul etmişik. Strateji münasibətlər iki prinsip əsasında qurulacaq: birinci, liberal-demokratik xətt aparan partiyalarla uzunmüddətli əməkdaşlıq qurmaq düşüncəsindəyik. İkinci, Azərbaycanın ümumdemokratik potensialını mobilizə edəcək geniş və əsaslı milli-demokratik birliyin yaradılmasına dəstək verəcəyik. Bu iki halda strateji münasibətlər qurmaq fikrindəyik. Taktiki münasibətlərə gəldikdə, seçkiöncəsi vəziyyətə uyğun qərar verəcəyik. Söhbət bələdiyyə və parlament seçkilərindən gedir. Düzdür, yeni yaranmış partiya kimi tam gücümüzlə bələdiyyə seçkilərində iştirak edə bilməyəcəyik. Ona görə əsas hədəf 2015-ci ilin parlament seçkiləri olacaq.

-         Bəs Milli Şurada qalacaqsınızmı?

-         Qurultaydan sonra Ali Məclisin keçirilən birinci sessiyasında məsələyə münasibət bildirdik. Bilirsiniz ki, biz Milli Şurada fərd olaraq fəaliyyət göstərirdik. Mən də daxil olmaqla, Ali Məclis üzv olanların qurumda üzvlüyünü dayandırmaq haqqında qərar qəbul etdi. Artıq iyulun 6-dan Milli Şurada fəaliyyətimizi dayandırdığımızı elan etmişik.   

-         Partiyanın sabiq lideri Rəsul Quliyevlə münasibətlərinizi necə quracaqsınız?

-         Bir daha deyirəm, biz siyasi münasibətlərimizi yuxarıda səslındirdiyim prinsiplər əsasında quracağıq. Prinsiplərdən biri Avropa siyasi standartlarını Azərbaycana gətirməkdir.  Bu, çox böyük iddia olduğundan çətindir. Amma səy göstərəcəyik ki, siyasi münasibətlərimizi qəbul etdiyimiz dəyərlər və Avropa standartları əsasında quraq. Yəni münasibətlərimizdə fərdi deyil, prinsipial yanaşmaya üstünlük veririk.

-         Deməli, Rəsul Quliyevlə siyasi yollarınız əbədi olaraq ayrıldı?

-         Mən bilmirəm ki, Rəsul Quliyevin gələcək siyasi yolu necə olacaq.   

-         Hakimiyyətə münasibətinizdə də həmin prinsiplər əsas götürüləcək?

-         Bəli. Bütün siyasi münasibətlər sistemi bu prinsiplər əsasında qurulucaq, istər müxalifət, istərsə də hakimiyyət olsun.

-         Azərbaycan gerçəkliyində isə heç bir prinsip işləmir, yazarlar demişkən, ölkə dəyərlər qəbiristanlığına çevrilib...

-         Biz fərqli mövqe göstərmək istəyirik və səy göstərəcəyik ki, prinsipial mövqeyimizi qoruyub saxlayaq.

-         Yəqin ki, yaxın günlərdə partiyalarla ikitərəfli münasibətlər qurmaq üçün danışıqlara başlayacaqınız?

-         Birincisi partiyanın rəsmi qeydiyyatı və ölkə ərazisində təşkilatlanması əsas prioritetdir. Eyni zamanda, daxildə layiqli yer tutmaq, xarici əlaqələri qurmaq prioritetlər sırasında olacaq.

-         Vaxtilə rəhbərliyində olduğunuz Müsavat Partiyası ilə münasibətləriniz hansı şəkildə qurulacaq?

-         Müsavat Partiyası qurultaya hazırlaşır. Ümid edirəm ki, qurultaydan sonra digər partiyalarla olduğu kimi bu partiyayla da müəyyən etdiyimiz prinsiplər əsasında normal münasibətlər qurulacaq.

-         Yeni rəhbərliklə...?

-         Əgər Müsavat Partiyasının nizamnaməsində dəyişiklik olmasa, rəhbərlik də dəyişiləcək.

 

 

Пока вы здесь ...

У нас есть небольшая к вам просьба. В среде, где информация находится под жестким государственным контролем, Мейдан ТВ усердно работает над тем, чтобы обеспечить доступ к качественной независимой журналистике. Мы проливаем свет на истории, которые вы иначе не прочитали бы, так как мы считаем, что те, кто не может высказаться, заслуживают быть услышанными, а те, кто находится у власти, должны быть привлечены к ответственности. Мы вкладываем в это значительное время, усилия и ресурсы, поэтому нам нужна ваша помощь.

Ваша поддержка дает возможность нашим смелым журналистам, многие из которых работают под большой угрозой своей личной свободе и безопасности, продолжать свою деятельность. Каждый вклад в защиту независимой журналистики в Азербайджане имеет значение. Спасибо.

ПОДДЕРЖИТЕ НАС
Bölmələr:  
Короткие линки:   http://mtv.re/uh4iuf

Самое читаемое