Leyla Əliyevanın şirkəti kənd təsərrüfatı ilə məşğuldur

Ramiz Mehdiyevin ailəsi dövlətdən subsidiya alır

Source:

Prezident İlham Əliyevin qızı, Heydər Əliyev Fondunun vitse-prezidenti Leyla Əliyevanın şirkəti kənd təsərrüfatı ilə də məşğuldur.

Bu barədə Azadlıq Radiosunun yaydığı

araşdırma

da qeyd olunur. Bildirilir ki, Abşeron rayonunu əhatə edən builki subsidiya siyahısında «İdeal Biznes Ko.» MMC-nin də adı var.

Xəzər rayonu ərazisində 120 hektar torpaq sahəsi bu şirkətə məxsusdir. Eyni zamanda «Xalq Bank» ASC-nin səhmlərinin yarısının sahibidir. Bankın özünə isə Leyla Əliyeva nəzarət edir.

Araşdırmada bu ilin iyulunda «Azərtac» dövlət informasiya agentliyinin  Maştağa qəsəbəsində zeytun bağının yandırılaraq məhv edilməsi haqda yaydığı məlumat xatırlanır. Həmin xəbərə görə, Abşeron rayonu Maştağa Subtropik Bitkilər Sovxozunun həmin 40 hektar torpaq sahəsini Abşeron rayon İcra Hakimiyyəti «İdeal Biznes Ko.» MMC-yə 99 il il müddətinə icarəyə verilib. Bağdakı zeytun və badam ağaclarının yandırılması da icarə müqaviləsinin bağlanmasında sonrakı dövrə təsadüf edir.

Azadlıq Radiosu zeytun bağının yandırılması faktı üzrə araşdırmanın gedişi ilə bağlı Ekologiya Nazirliyinə sorğu göndərib. Nazirlikdən bildiriblər ki, polisə bu qurumla yanaşı «İdeal Biznes Ko.» MMC-nin özü də müraciət edibmiş. Amma polis yanğını törədənləri və ağacları kökündən çıxaranları tapa bilməyib. Bu haqda nazirliyə məktub göndərməklə Sabunçu rayon Polis İdarəsi işini başa çatmış hesab edib. Nazirlikdə əlavə ediblər ki, yaxın vaxtlarda «İdeal Biznes Ko.» şirkəti burada yeni texnologiyalar əsasında badam bağı salmağa hazırlaşır. “Yanğını törədənlər kimlərdisə, ərazini yaşlaşmış ağaclardan təmizləməklə şirkətin işini əməlli-başlı asanlaşdırıblar”- araşdırmada qeyd olunur.

Yazıda həmçinin Prezident Administrasiyasının rəhbəri, Korrupsiyaya Qarşı Mübarizə üzrə Komissiyanın sədri, akademik Ramiz Mehdiyevin ailə üzvlərinə məxsus təsərrüfatlardan da bəhs olunur. Bildirilir ki, ailənin ötən il əkin təyinatlı 136 hektar torpaq sahəsi vardısa, bu il həmin sahələr bir az da genişlənərək, 216 hektarı keçib. Buraya yay evlərinin sahələri daxil deyil.

Mehdiyevlər ailəsi əsasən Abşeronun Novxanı kəndində kənd təsərrüfatı ilə məşğul olurlar. Amma onların keçmiş Maştağa subtropik bitkilər sovxozunun ərazisində Goranboy rayonunda da iri təsərrüfatları var.

Kənd Təsərrüfatı Nazirliyi əkin sahələrinə görə dövlət büdcəsindən subsidiya alan şəxslərin yeni siyahısını açıqlayıb. Siyahıda Ramiz Mehdiyevin xanımı – Bakı Dövlət Universitetinin Hesablama Riyaziyyatı Kafedrasının müdiri, professor Qalina Yuryevna Mehdiyevanın həmçinin BDU-nun Sosial və pedaqoji psixologiya kafedrasının müdiri Kamilə Əliyeva və oğlu – fövqəladə hallar nazirinin müavini, general-mayor Teymur Mehdiyev ilə adı, soyadı və ata adı uyğun gələn şəxslərin də adları var. Nazirliyin yanında fəaliyyət göstərən Respublika Komissiyasının qərarına əsasən, bu il onlara 10 min 816 manat yardım verilib. Qanunvericiliyə əsasən, subsidiya məbləği onu alan şəxslərin «Kapital Bank» ASC-dəki kart hesabına köçürülür.

“Novxanı kənd ərazi komissiyasının qərarında göstərilir ki, bu kənddə əkin sahələrinə görə dövlətdən yardım alan cəmi iki nəfər var. Mehdiyevlərə məxsus torpaqların ərazisi bir ildə 100 hektardan 152 hektara qalxıb. Əvvəlki ildə subsidiya yalnız Q. Mehdiyevaya məxsus 100 hektar torpağın əkilməsinə görə ödənilmişdi.

Maştağa qəsəbəsindəki keçmiş Subtropik Bitkilər Sovxozunun ərazisində Qalina Mehdiyeva və Kamilə Əliyevaya məxsus kənd təsərrüfatı torpaqlarının sahəsi bir ildə nə artıb, nə də azalıb. Ananın mülkiyyətində 8,92 hektar, onun qızının isə 2,4 hektar torpaq var.

Amma Mehdiyevlərin Goranboyun Xınalı kəndindəki bağ sahəsi son bir ildə iki dəfə böyüyüb. Hər halda KTN-in məlumatında belə deyilir. Hazırda Qalina Mehdiyevanın bu kənddəki bağının sahəsi 50 hektara çatıb. Ötən il verilən məlumatlarda Xınalı kənd ərazi komissiyası sahibkarın adını Mehdiyeva Qalina Yuryevna kimi göstərsə də, bu dəfəki siyahıda səhvən «Qalina Mehdiyevna» kimi göstərib” – araşdırmada qeyd olunur.

Ana səhifəAraşdırmaLeyla Əliyevanın şirkəti kənd təsərrüfatı ilə məşğuldur