Ata Abdullayev məhkəmə qarşısına çıxarılır

Ata Abdullayevin adları çəkilən şəxsləri onlar haqqında rüsvayedici məlumatlar yaymaqla hədələyib, bunu etməmək üçün onlardan pul tələb etdiyi iddia olunur.

Foto: Meydan TV


Zərərçəkənlərdən biri icra nümayəndəsidir

Sosial şəbəkələrdə Azərbaycan hakimiyyətini dəstəkləyən paylaşımları və qalmaqallarla tanınan vloger Ata Abdullayevin işi üzrə istintaq başa çatıb.

Onun haqqındakı cinayət işinin materialları Bakı Ağır Cinayətlər Məhkəməsinə göndərilib.

Yaxın günlərdə məhkəmədə hakim Fikrət Qəribovun sədrliyilə bu iş üzrə məhkəmənin hazırlıq iclası keçiriləcək.

Bu il martın 12-də Dövlət Təhlükəsizliyi Xidmətinin (DTX) əməkdaşları tərəfindən saxlanılan Ata Abdullayev Cinayət Məcəlləsinin 182-ci (hədə-qorxu ilə tələb etmə) maddəsilə ittiham olunur.

Onun işində dörd nəfər zərərçəkmiş qismində tanınıb: Elmar Əliyev, Cəmil Babayev, Elçin Əliyev və Şahlar Həsənov.

Ata Abdullayevin adları çəkilən şəxsləri onlar haqqında rüsvayedici məlumatlar yaymaqla hədələyib, bunu etməmək üçün onlardan pul tələb etdiyi iddia olunur.

Zərərçəkmişlərdən Şahlar Həsənov Abşeron Rayon İcra Hakimiyyəti başçısının Masazır üzrə nümayəndəsidir.

Ata Abdullayev bir neçə il əvvəl də keçmiş Milli Təhlükəsizlik Nazirliyinin əməkdaşları tərəfindən həbs olunmuşdu.

O zaman onlayn qaydada kartlardan oğurluqda təqsirləndirilən Ata Abdullayevə sonradan məhkəmənin hökmü ilə şərti cəza verilmişdi.

Ana səhifəSiyasətAta Abdullayev məhkəmə qarşısına çıxarılır