Orxan Adıgözəl
Orxan Adıgözəl

Dəyişikliyi necə etməli?

Mütləq nəsə etmək lazımdır! Yazıq-fəqir duruma düşmüşük, vallah...

İntiharlar artıb, ətrafdan üzümüzə qara şüalar saçılır. İnsanlarımız bədbinləşib. Dəyərlər günü-gündən itir və tapılmır. Azadlığımız məhdudlaşdırılır.

Bir çoxumuz bu qədər monotunluğun içində qismən azad olan internetdə və sosial şəbəkələrdə elə qismən rahatlıq və xoşbəxtlik tapır, sözünü-problemini bölüşə və yaya bilir. Təəssüf ki, ora da bir çox halda iradəcə zəif cəmiyyətimizə öz əks təsirini göstərir.

Ölkəmizdə senzurasız və obyektiv informasiya üçün yerli telekanallara yox, internetə və sosial mediaya üstünlük verirlər. Burda alınan məlumatlardan yeni, azad ictimai fikir, rəy formalaşır.

İctimai rəy ictimai şüurun elə təzahürüdür ki, burada böyük sosial qrupların, bütövlükdə xalqın aktual hadisələrə münasibəti (yaxud onları qiymətləndirilməsi) əks olunur.

İctimai rəyi formalaşdıranlar xalq üzərində müəyyən təsir və nüfuza malik siyasi partiya liderləri, vətəndaş cəmiyyətinin və ictimai sektorun fəalları, ziyalılar və yazıçılardır.

Bu gün Azərbaycan cəmiyyəti mürəkkəb böhran yaşayır. Böyük əksəriyyət durğunlaşıb, süstləşib.

Fəal kütlə arasında isə ziddiyyətlər mövcuddur. İnsanlar ifrat dünyəviliklə ifrat mühafizəkarlıq arasında seçim edirlər.

Bu ziddiyyətin qaynağı isə plüralizmi qəbul etməməkdir. Plüralizm cəmiyyətdə demoktik işartıları alovlandırır, ictimai həyatı canlandırır, fərqli düşüncələrin meydana gəlməsinə vasitəçi olur.

İnsanları bu monoton həyat tərzindən çıxarıb, orijinal və rəngarəng həyat vermək əsas zərurətdir. Bunu isə vətəndaş həmrəyliyi ilə, maarifçiliklə həyata keçirmək lazımdır.

Məhz maarifçilik sayəsində cəmiyyət immunitetini qaldıra bilər. Maarifçiliyi tətbiq etməyə yerli televiziya kanallarının “vaxtı” yoxdur. Onlar öz mahiyyətlərini unudublar.

Ona görə bu vəzifə düşür sosial medianın üzərindən ictimai rəyi formalaşdırmaq qabiliyyəti olanların üzərinə.

Süni gündəmlər yaradıb, geriləyən cəmiyyətimizi daha da inkişafdan saxlamayın. Yeni tutarlı ictimai rəy formalaşdırıb hər kəsi bu işə səfərbər etmək gərəkdir. 500-1000 “like” yığmaq xətrinə lağlağı, qaragüruh xarakterli postlarla ciddi dəyişiklik gözləmək sadəlövhlükdür.

Azərbaycanın soyuq və bulanıq sularında gizlənmiş təhlükəli aysberqləri görən vicdanlı insanlar təcili surətdə hərəkətə keçməlidirlər.

Dünyaya yeni gözlə baxan, müasir təfəkkürlü yeni bir nəsil yetişdirmək gərəkdir.

Kitab sektoru hərətəfli inkişaf etsə, artıq təbii olaraq, qütbləşmə və mədəniyyətsizliyin səviyyəsi aşağı düşəcək. Düşüncələri dəyişmək üçün yazmaq və oxumaq fərzdir.

Sabahkı Azərbaycanı yaşama zövqünü tərk edib, yaşatma eşqinə könül verən səbirli, əzimli, səmimi könüllülər xilas edəcəklər. Şəxsi maraqlarımızı, eqolarımızı bir kənara buraxmağın vaxtıdır.

Yazı müəllifin fikirlərini əks etdirir və Meydan TV-nin mövqeyi ilə üst-üstə düşməyə bilər.