Xəstələr Baş hemotoloqun dediklərini yalanladı

"Bircə dəfə bizə pulsuz dərman veriblər, qalan hamısını özümüz almışıq"

"15 yaşacan olan uşaqlar arasında ölümün əsas səbəblərindən biri qanın bədxassəli xəstəlikləridir", - Elmi Tədqiqat Hematologiya və Transfuziologiya İnstitutunda keçirilən mətbuat konfransında baş hemotoloq Çingiz Əsədov belə deyib. O, bu xəstəlikdən əziyyət çəkənlərin xərclərinin dövlət proqramları vasitəsilə qarşılandığını bildirib.

"Bizdə talassemiya, hemofiliya proqramı var. Bu proqramlar uşaqların irsi qan xəstəliklərinin xərclərini tam ödəyir. Yəni xəstənin ailəsi heç bir dərmana, qan preparatlarına ödəniş etmir. Bu, onların ailə durumuna təsir etmir. İndiyə qədər leykozlu xəstələr dövlət tərəfindən qarantiya verilən "169" adlı dərmanları alırdılar. Dövlət proqramına görə, dərmanlar alınandan sonra tender elan olunacaq, bütün leykozlu xəstələr lazımi preparatları pulsuz alacaqlar".

Çingiz Əsədov bildirib ki, qan xəstəliklərinin erkən diaqnostikası üçün əhalini xəstəlikdən öncə müayinə etmək lazımdır:

"İl ərzində 150 min gənc müayinədən keçib. Onların bəzilərində qan xəstəlikləri aşkarlanıb və müalicə üçün həkimlərə yönləndiriliblər".

Konfransda 2016-cı ildə leykozlu xəstələrin sayının 10-15 faiz artdığı açıqlanıb. Talassemiyaya yoluxmuş xəstələrin statistikasından danışılıb.

"2015-ci ilin 7 ayı ərzində 84600 şəxs icbari tibbi müayinədən keçib. Onlardan 5534 nəfərdə, 48 cütlüyün hər ikisində talassemiya daşıyıcılığı aşkarlanıb. 2016-cı ildə isə 145694 şəxs müayinədən keçib. Onlardan 4649 nəfərdə və 42 cütlükdə talassemiya daşıyıcılığı aşkarlanıb".

Elmi-Tədqiqat Hematologiya və Transfuziologiya İnstitutunda müalicə alan leykozlu uşaqların valideynləri isə bütün dərmanları öz hesablarına aldıqlarını deyirlər.

"Bircə dəfə bizə pulsuz dərman veriblər, qalan hamısını özümüz almışıq. Bütün xəstələr dərmanı pulla alır, təkcə biz deyilik. Burada illərlə yatanlar var. Hətta imkansızlıq ucbatından müalicəsini saxlayanlar da olur", - Gülcüyə Əzimova deyir.

Sevinc İbrahimovanın da qızı leykoz xəstəsidir. O, 1 ilyarımdır dərmanları öz hesabına aldığını söyləyir:

"Həkim dərman yazıb, amma onu almağa imkanımız yoxdur, otuz neçə manatadır. Sümük dərmanları yazırlar, birinin qiyməti 20 manata yaxındır. Əksəriyyəti də bağırsağa, ürəyə ziyanlıdır. Qaraciyərə, mədəaltı vəzə - hamısına müalicə lazımdır. USM-ə aparırsan, rentgeni çıxarırsan, hamısı puldur".

"2017-2021-ci illər üçün qanın bədxassəli xəstəlikləri ilə mübarizə üzrə Tədbirlər Proqramı" üzrə 2500-dən artıq xəstə, o cümlədən 300 uşaq qeydiyyatdadır.

2017-ci ilin dövlət büdcəsindən hemofiliya və talassemiya irsi qan xəstəliklərinin müalicəsinə 18,5 milyon ayrılıb.

x

YAZARIN DİGƏR YAZILARI