''Yanan bina işi'': 21 nəfər məhkəmədə ifadə versin

foto Meydan TV

foto Meydan TV

Vəkil: ''Arif Əliyev ifadə versin. MTN rəhbərliyi bu işçi vasitəsilə Miryusif Mahmudovla əlaqə yaradaraq pul tələb edib''

Noyabrın 10-da Bakı Ağır Cinayətlər Məhkəməsində Binəqədi rayonunda 16 mərtəbəli binada baş vermiş yanğınla bağlı təqsirləndirilən “Qlobal Stone” MMC-nin baş direktoru Uğur Bəşirov, “Global Construction” MMC-nin təsisçisi və idarə heyətinin sədri Miryusif Mahmudov və digər şəxslərin cinayət işi üzrə növbəti məhkəmə prosesi keçirilib.

Meydan TV-nin məlumatına görə, hakim Əfqan Hacıyevin sədrlik etdiyi prosesdə şahid Məlahət Ağasıyevanın məhkəməyə daxil olan ərizəsi elan edilib.
O, ərizəsində istintaqa verdiyi ifadəsini təsdiqləyib. Qeyd edib ki, Səhiyyə Nazirliyinin Gigiyena və Epidemiologiya Mərkəzində həkim işləyib. Onun bildirdiyinə görə, poliuretan materialın tərkibində zəhərli maddə olması müəyyən edilib və bu da zəhərlənməyə səbəb olub.
Hakim daha sonra şahid Məlahət Ağasıyevanın ifadəsini elan edib. O, ifadəsində işlədiyi dövrdə Səhiyyə Nazirliyinin Gigiyena və Epidemiologiya Mərkəzinin baş direktoru olmuş Akif Əlibəyovun əleyhinə ifadə verib.

Təqsirləndirilən Akif Əlibəyov isə Məlahət Ağasıyevanın ona böhtan atdığını, qərəzli ifadə verdiyini deyib. Bildirib ki, Məlahət Ağasıyeva işdən töhmətlə kənarlaşdırılıb. Buna görə də, o, düşmənçilik edir.

Daha sonra Miryusif Mahmudovun vəkili İlhamə Həsənova vəsatətlə çıxış edib. O 21 nəfərin məhkəmədə əlavə şahid qismində dindirilməsini istəyib. Bildirib ki, həmin şahidlərdən biri Arif Əliyev “Qlobal Stone” MMC-nin işçisi olub: "MTN rəhbərliyi bu işçi vasitəsilə Miryusif Mahmudovla əlaqə yaradaraq pul tələb edib".

Hakim vəsatəti növbəti prosesdə müzakirə edəcəklərini deyib.

İclas noyabrın 15-də davam edəcək.

Ötən il mayın 19-da Binəqədi rayonu ərazisində, metronun “Azadlıq” stansiyasının yaxınlığında 16 mərtəbəli yaşayış binasında baş verən yanığında 15 nəfər həyatını itirib, 30 nəfərdən çox şəxs xəsarət alıb.

“Qlobal Stone” MMC-nin baş direktoru Uğur Bəşirov, “Global Construction” MMC-nin təsisçisi və idarə heyətinin sədri Miryusif Mahmudov, həmin cəmiyyətin idarə heyətinin sədr müavini Ələkbər Əsgərov, Binəqədi rayon İcra Hakimiyyəti başçısının sabiq birinci müavini Qəzənfər Novruzov, 2012-2013-cü illərdə Binəqədi rayon Mənzil Kommunal Təsərrüfat Birliyinin rəisi işləmiş rayon icra hakimiyyətinin təsərrüfat şöbəsinin müdiri olmuş Ədalət Rəcəbov, Binəqədi rayonu, 72 saylı Mənzil Kommunal İstismar Sahəsinin rəisi Nizami Orucov, “Dərnəgül Boru Zavodu” Qapalı Səhmdar Cəmiyyətinin sınaq laboratoriyasının müdiri Ağacavad Məmmədov həbs olunublar.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/67wnvj

Ən çox baxılan