Xədicə İsmayıl yaxşıdır, saxlanma şəraitindən heç bir şikayəti yoxdur
Oktyabrın 22-də vəkili Fariz Namazlı həbsdəki jurnalist Xədicə İsmayılla görüşüb.
Fariz Namazlı Azadlıq Radiosuna deyib ki, Xədicə İsmayıl yaxşıdır, saxlanma şəraitindən heç bir şikayəti yoxdur:
“Oktyabrın 29-da Bakı Apellyasiya Məhkəməsindəki proseslə bağlı məsləhətləşdik. Çox güman ki, elə həmin gün də proses yekunlaşacaq”.
Sentyabrın 1-də Bakı Ağır Cinayətlər Məhkəməsi Xədicə İsmayılı 7 il yarım azadlıqdan məhrum edib.
Məhkəmə onu Cinayət Məcəlləsinin 179.3.2-ci (mənimsəmə və israf etmə – külli miqdarda törədildikdə), 192.2.2 (qanunsuz sahibkarlıq), 213.1(vergi ödəməkdən yayınma) və 308.2-ci (vəzifə səlahiyyətlərindən sui-istifadə) maddələri ilə təqsirli bilib.
Bakı Apellyasiya Məhkəməsi Xədicə İsmayılın bu hökmdən şikayətinə baxır.
Növbəti proses oktyabrın 29-a təyin olunub. Apellyasiya Məhkəməsinin elə həmin gün qərarını açıqlayacağı gözlənir.
Xədicə İsmayıl 2014-cü ilin dekabrında həbs olunub. Jurnalist ona qarşı ittihamları rədd edir və həbsinin jurnalist fəaliyyəti ilə bağlı olduğunu deyir.