İyunun 21-də Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin həbsdə olan Aparat rəhbəri Vidadi Zeynalov və digərlərinin cinayət işi üzrə məhkəmə prosesi davam edib.
Meydan TV-nin məlumatına görə, hakim Əfqan Hacıyevin sədrliyi ilə keçirilən iclasda Vidadi Zeynalovun vəkilləri müdafiə çıxışı ediblər. Vəkil Bəylər Məmişov bildirib ki, hüquqlarını elan olunan ittiham məhkəmə istintaqı zamanı sübuta yetirilməyib. Onun sözlərinə görə, V.Zeynalovun vəzifə səlahiyyətində nazirliyin maliyyə məsələlərinə nəzarət olmayıb: “Yəni bu baxımdan ona qarşı dövlət əmlakını mənimsəmə ittihamının verilməsi absurddur. Çünki dövlət əmlakının onun sərəncamına verilməsi qeyri-mümkün idi. Nazirliyin aparat rəhbəri olan Vidadi Zeynalov maddi-məsul şəxs olmayıb. Məhkəmə istintaqı zamanı da istintaq orqanın irəli sürdüyü ittihamların Vidadi Zeynalova aidiyyatı olmaması sübuta yetirilib. Təqsirləndirilən digər şəxslər və şahidlər məhkəmədəki ifadələrində Vidadi Zeynalov tərəfindən hər hansı qanunsuz göstəriş verilmədiyini deyiblər. Digər tərəfdən, məhkəmədə bəlli olan Vidadi Zeynalovun müəyyən insanlara aylıq paket formasında əmək haqqı verməsi birbaşa rəhbərliyin göstərişi ilə olub. Yəni onun yerinə kim olsaydı, rəhbər şəxsin əmrini yerinə yetirərdi. Burada da məsuliyyəti Vidadi Zeynalov yox, rəhbər şəxs daşıyır. Bu baxımdan mən hüquaqlarını müdafiə etdiyim şəxs barəsində bəraət hökmünün çıxarılmasını istəyirəm”.
B.Məmişov V.Zeynalov tərəfindən dövlətə vurulan ziyandan 4 milyon 200 min manat ödənildiyi barədə qəbzi hakimlər kollegiyasına təqdim edib.
V.Zeynalovun digər vəkili Elxan Süleymanlı isə çıxışında hüquqlarını müdafiə etdiyi şəxsə bəraət verilməsini istəyib.
Beytulla Hüseynovun vəkili Vilayət Nadirov isə çıxışında qeyd edib ki, B.Hüseynov vurulmuş ziyanı tam ödəyib və buna görə, o, azadlığa buraxılmalıdır: “Buna görə sizdən xahiş edirəm ki, onun barəsində 70-ci maddəni tətbiq edib, onu azadlığa buraxasınız və özünün, qohumlarının əmlakına qoyulmuş həbsi götürəsiniz”.
Məhkəmə digər vəkillərə çıxış üçün vaxt verib. Proses iyulun 5-də davam etdiriləcək.
Baş Prokurorluq tərəfindən həyata keçirilmiş istintaq-əməliyyat tədbirləri ilə „Bakı Telefon Rabitəsi“ İstehsalat Birliyinin baş direktoru Beytulla Hüseynovun 2009-2015-ci illərdə arvadının təsisçisi olduğu “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, yaxın münasibətlərdə olduğu “3 nömrəli Rabitə Təmir Tikinti”, “Rabitə Mülki Tikinti” MMC-lərinin direktoru Emin Məmmədov və birliyin baş mühasibi Anar Mustafayevlə qabaqcadan əlbir olub yeni rabitə xətlərinin çəkilməsi, binaların, qurğuların təmiri-tikintisi və sair işlərin yerinə yetirilməsi üçün onların hesablaşma hesablarına köçürüləcək pul vəsaitlərinin işlərin həcmindən asılı olaraq 35-45% həcmində hissəsinin nağdlaşdırılaraq B. Hüseynovun özünə verilməsi barədə razılığa gəliblər. B. Hüseynov tabeliyində olan qovşaqların formal olaraq keçirdikləri tenderlərdə vəzifə saxtakarlığı ilə həmin məhdud məsuliyyətli cəmiyyətlərin qalib elan olunaraq müqavilələr bağlanmaqla və faktiki işlərin tam icra olunmadığı halda, o cümlədən internet xidmətinin təmin edilməsi üçün fiber-optik kabel xətlərinin çəkilişi zamanı işlərin faktiki olaraq telefon qovşaqları tərəfindən aparıldığı halda guya həmin işlərin faktiki özünə məxsus olan müəssisələr tərəfindən görülməsi və işlərin həcminin artırılması barədə saxta sənədlərin tərtib edilməsi yolu ilə adıçəkilən MMC-lərin hesabına köçürülmüş ümumilikdə 71 milyon 263 min manat məbləğində vəsaitin 21 milyon 379 min manatını mənimsəməklə dövlətin qanunla qorunan mənafelərinə ağır nəticələrə səbəb olan zərər vurmalarında şübhələr üçün əsaslar müəyyən edilib.
Bununla yanaşı, nazirliyin Aparat rəhbəri Vidadi Zeynalov qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdəç olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat vəsaitin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib.
Cinayət işi üzrə nazirliyin strukturuna daxil olan “Aztelekom” MMC, “AzİnTelekom” MMC, “Azərpoçt” MMC, Məlumat Hesablama Mərkəzi və özəl şirkət “Optik Rabitə Tikinti və Quraşdırma” MMC-nin fəaliyyətində də mənimsəmə və israf etmə, vəzifə səlahiyyətlərindən sui-istifadə və vəzifə saxtakarlığı faktları müəyyənləşib.
İş üzrə Beytulla Hüseynov, Anar Mustafayev, Emin Məmmədov, Bayram Vəliyevə və “Aztelekom” MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin “AzİnTelekom” MMC-nin baş direktoru Cəlil Cəfərova, “Azərpoçt” MMC-nin baş direktoru Qəmbər Bəybalayevə və “Optik Rabitə, Tikinti və Quraşdırma” MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs-qətimkan tədbiri seçilib.
