Bu gün Bakı Apellyasiya Məhkəməsində jurnalist Rauf Mirqədirovun apellyasiya şikayəti üzrə məhkəmə davam etdirilib.
“Report”un məlumatına görə, hakim Abid Abdinbəyovun sədrliyi ilə keçirilən prosesdə R.Mirqədirovun vəkili Fuad Ağayev çıxış edib. O, jurnalistə bəraət verilməsini xahiş edib.
Məhkəmə sabah davam etdiriləcək.
Prosesdən sonra jurnalistlərə açıqlama verən R.Mirqədirovun anası Rəfiqə İsayeva oğlunun səhhətində problemlər olduğunu bildirib. Onun sözlərinə görə, başında güclü ağrılar olan R.Mirqədirov hazırda dərman qəbul edir.
R.Mirqədirov 2014-cü ilin aprel ayında Türkiyədə saxlanılıb. Jurnalist daha sonra Azərbaycana deportasiya olunub. O, Cinayət Məcəlləsinin 274-cü (dövlətə xəyanət) maddəsi ilə ittiham olunub. Bakı Ağır Cinayətlər Məhkəməsinin hökmü ilə R.Mirqədirov 6 il müddətinə azadlıqdan məhrum edilib. O, həmin hökmdən apellyasiya şikayəti ilə Bakı Apellyasiya Məhkəməsinə müraciət edib.
Jurnalist ona verilmiş ittihamları qəbul etmir və beynəlxalq insan haqları təşkilatları tərəfindən siyasi məhbus kimi tanınır.
